پنجشېر کې د اخلاقي فساد په تور درې کسان نیول شوي

پاراخ (پژواک، ۱۴ وری ۱۴۰۴): پنجشېر کې مسوولین وايي چې د دغه ولایت په مرکز بازارک کې درې کسان د پولیسو له لوري د اخلاقي فساد په تور نیول شوي دي.

د پنجشېر د امنیې قوماندانۍ ویاند حقمل سعد پژواک خبري اژانس ته وویل، یاد کسان تېره ورځ د دغه ولایت په مرکز بازارک کې د پولیسو له لوري د «لواطت» په جرم  نیول شوي دي.

د هغه په خبره، نیول شوو کسانو پر خپل جرم اعتراف کړی او دوسیه یې د لا ډېرې څېړنې لپاره عدلي او قضایي ارګانونو ته سپارل شوې ده.

سعد زیاته کړه چې دغه عمل له یوه ۱۹ کلن هلک سره ترسره شوی او تورن کسان د دغه کار د ارتکاب پر مهال نیول شوي دي.