له پاکستانه د افغان کډوالو د را ایستلو دویمه څپه؛ مسوولین: راتګ ته یې هر ډول چمتووالی لرو

جلال‌اباد (پژواک، ۱۶ وری ۱۴۰۴): په داسې حال کې چې له پاکستانه د افغان کډوالو د را ایستلو په دویمه څپه کې تر اوسه د ګوتو په شمېر کورنۍ هېواد ته راکډه شوې، ننګرهار کې د کډوالو او راستنېدونکو چارو رياست مسوولین وايي چې بشپړ چمتووالی لري او هڅه کوي د تېر ځل په څېر ورته ښه خدمات وړاندې کړي.

د ننګرهار ولايت د کډوالو او راستنېدونکو چارو رييس بازمحمد عبدالرحمن چې نن يې د کډوالو د راستنېدو د چارو تنظيم په موخه بېړنۍ ناسته ترسره کړه، پژواک خبري اژانس ته وویل، د کډوالو د راتګ دویمې څپې ته بشپړ چمتووالي لري.

هغه وویل، نننۍ غونډه کې یې کډوالو ته د اسانتیاوو په رامنځته کولو او خدمتونو خبرې کړې او دغه راز یې له اړوندو موسسو او خیريه بنسټونو سره هم پر ښې همغږۍ بحث کړی دی.

دغه راز، په تورخم کې د کډوالو چارو رياست د انتقالاتو امر بخت‌جمال ګوهر پژواک ته وويل چې تورخم کې د کډوالو د انتقال لپاره بشپړ چمتووالی نيول شوی دی.

هغه زیاته کړه، د انتقالاتو امریت د ټولو کډوالو د ثبت او بایومټریک پروسه پر مخ وړي، بیا کډوال د تورخم عمري کمپ ته انتقالوي او له هغه ځایه بیا د اسلامي امارت د مرستو له ترلاسه کولو وروسته اړوندو موسسو ته سپارل کېږي.

نوموړي وویل: «دلته ټولې ادارې د کډوالو لپاره بشپړ چمتووالی لري، کډوالو ته په عمري کمپ کې د لنډمهالي مېشتېدنې زمينه برابره شوې، د اوسېدو لپاره خیمې، د خوراک انتظام او د درملنې لپاره بېلابېل روغتيايي ټيمونه هم موجود دي.»

د معلوماتو له مخې، د تېرې یوې ورځې په ترڅ کې ۳۲۵ افغان کډوال د تورخم له لارې هېواد ته راستانه شوي دي.

د ورکړل شوو شمېرو له مخې، په دغو کډوالو کې ۲۹۴ کسان د ۶۲ کورنیو غړي او ۳۱ تنه نور انفرادي ډيپورټ شوي کډوال دي چې د ګاونډي هېواد له لوري بېرته افغانستان ته را استول شوي دي.

راستانه شوي کډوالو که څه هم د کډوالو ادارو له لوري په تورخم کې د ترسره شوو لومړنيو مرستو څخه خوښ دي خو وايي، دوی ته دې د سرپناه، کار او ماشومانو ته د زده‌کړو زمینې برابرې شي.

ریحان‌الله چې د پاکستان په پنجاب کې اوسېده او تازه هېواد ته راستون شوی، وايي، هلته پرې پوليسو ژوند ډېر تنګ کړی و او هېواد ته يې په جبري ډول راستون کړی دی.

هغه وویل: «موږ هلته کاروبار درلود، دلته نه د اوسېدو ځای لرو، نه کاروبار لرو او نه کومه بله وسیله، نو حکومت دې موږ سره مرستې وکړي.»

د ننګرهار د کډوالو چارو رياست وايي، راستنېدونکو کډوالو سره د لومړنيو مرستو سربېره د اړوندو موسسو له لوري دوامداره مرستې هم کېږي او د کار او سرپناه برخه کې به هم ورته زمینه برابره شي.