بلخ کې د ۱۸۰ لوبغاړو ترمنځ د کورش سیالۍ وشوې

مزارشریف (پژواک، ۲۳ وری ۱۴۰۴): د بلخ بدني روزنې ریاست مسوولین وایي چې د دغه ولایت په مرکز مزارشریف ښار او بلخ ولسوالۍ کې د ۱۸۰ لوبغاړو ترمنځ د کورش یو ورځینۍ سیالۍ ترسره شوې.

د بلخ د بدني روزنې او ورزش ریاست د مطبوعاتو مسوول حمیدګل لېوال پژواک خبري اژانس ته وویل چې د دې سیالیو موخه د کورش لوبې د ودې او ملي لوبو ته د غوره کسانو ورپېژندل دي.

د لېوال په خبره، په بلخ کې د دغو سیالیو ترسره کول د کورش ورزش د ودې لپاره مهم دي او د دوام لپاره یې هڅې روانې دي.

د نوموړي د معلوماتو له مخې، د بلخ په مرکز مزارشریف ښار سینا سټډیوم کې د ۱۰۰ او بلخ ولسوالۍ کې د ۸۰ لوبغاړو ترمنځ د یوې ورځې لوبې لپاره دغه لوبې ترسره شوې.

بلخ یو کورش‌کار عزیزاحمد وایي، ورزشي سیالۍ، په ځانګړي ډول د کورش سیالۍ مهمې دي او د دغه ولایت اوسېدونکي د داسې سیالیو جوړېدو غوښتونکي دي.

د کورش یو بل ورزشکار صبغت‌الله وایي چې مسوولین دې ورزشکاران وهڅوي او د لا پرمختګ لپاره دې ورته اسانتیاووې برابرې کړي.

د یادونې ده، له دې مخکې هم د اختر شپو او ورځو کې د دغه ولایت په چهارکنت، کشندې، شورتیپې او کلدار ولسوالیو د سلګونه ورزشکارانو ترمنځ د غېږنیونې سیالۍ ترسره شوې وې.