د پاکستان له زندانونو ۲۶۳ نور افغانان ازاد شول

کابل (پژواک، ۲۳ وری ۱۴۰۴): د کډوالو او راستنېدونکو چارو وزارت وايي چې ۲۶۳ نور افغانان د پاکستان له زندانونو خوشې او هېواد ته راستانه شول.

یاد وزارت پر خپله اېکس‌پاڼه لیکلي چې دغه کسان د وري میاشتې په ۲۱مه او ۲۲مه هېواد ته راستانه شول.

سرچینې د کندهار د سپین‌بولدک د سرحدي امریت له قوله لیکلي چې یاد ۲۶۳ کسان د پاکستان په بېلابېلو سیمو کې نیول شوی وو او له یوې تر پنځو ورځو بندیان وو.

د کډوالو وازارت لیکلي چې یاد افغانان د بشري مرستو له ترلاسه کولو وروسته خپلو اصلي سیمو ته لېږدول شوي دي.

دا په داسې حال کې ده چې وړمه ورځ هم ۱۹۲ افغان کډوال د پاکستان له زندانونو ازاد او هېواد ته راګرځېدلي وو.