د افغانستان بهرنیو چارو وزارت په مسکو کې پر افغان ماشوم د برید قضیه تعقیبوي

کابل (پژواک، ۵ چنګاښ ۱۴۰۴): د افغانستان د بهرنیو چارو وزارت وایي، په مسکو کې د یوه کس له خوا د سخت ټپي شوي افغان ماشوم قضیه یې له نږدې څېړلې، د ماشوم له کورنۍ سره یې نغدي مرسته کړې او دا موضوع تعقیبوي.

د راپورونو له مخې، د ولادیمیر ویتکوف په نوم یوه ۳۱ کلن بلاروسي وګړي پرون (چهارشنبه، د چنګاښ ۴مه) د یزدان په نوم پر یوه افغان ماشوم د مسکو په شرمتیو هوايي ډګر کې برید وکړ.

د امنیتي کامرو ویډیویي انځورونه ښیي چې ویتکوف ماشوم راپورته کوي او په ډېر شدت یې پر ځمکه وهي. راپورونه ښیي چې ماشوم د سر او ملا برخو کې سخته صدمه لیدلې او اوس د کوما په حالت کې دی.

د راپورونو له مخې، ویتکوف له برید وروسته نیول شوی او د پوښتنو پر مهال یې ویلي: «هڅه مې وکړه ماشوم ووژنم.»

د افغانستان اسلامي امارت د بهرنیو چارو وزارت مرستیال ویاند احمدضیا تکل پژواک خبري اژانس ته وویل چې دغه وزارت له یادې پېښې وروسته په مسکو کې د افغانستان سفارت ته هدایت وکړ چې د ماشوم پوښتنه وکړي، دا قضیه وپلټي او تعقیب یې کړي.

د هغه په وینا، وروسته په مسکو کې د افغانستان سفارت ډیپلوماتانو دغه ماشوم له نږدې ولید او د ماشوم له کورنۍ سره یې نغدي مرسته وکړه.

هغه وایي چې د ماشوم وضعیت اوس ښه دی او له خطره وتلی دی.

تکل وویل چې «مجرم» نیول شوی او د هغه دغه جنايي قضیه تر تعقیب لاندې ده.

د نوموړي په خبره چې د بهرنیو چارو وزارت له خپلو ټولو امکاناتو کار اخلي، څو د ماشوم درملنه وشي او قضیه یې وڅېړل شي.