غور کې د یوې زړې مرمۍ چاودنې دوه ماشومان وژلي

فیروزکوه (پژواک، ۱۱ چنګاښ ۱۴۰۴): غور کې ځايي چارواکي وايي چې د دغه ولایت په مرکز فیروزکوه کې له تېرو جګړو پاتې د راکټ یوې مرمۍ چاودنې دوه ماشومان وژلي او یو بل یې ټپي کړی دی.

د غور د امنیې قوماندانۍ ویاند مولوي عبدالرحمن بدري یاد خبر تایید کړی او ویلي یې دي، دغه پېښه پرون غرمه د دغه ولایت د مرکز فیروزکوه ښار په لوېدیځ کې په بند باین سیمه کې شوې ده.

هغه زیاته کړه، یاده مرمۍ په سیمه کې له تېرو جګړو پاتې وه او هغه مهال چاودېدلې چې ماشومانو پر مرمۍ لوبې کولې.

بدري څرګنده کړه چې د یادې پېښې قربانیان کوچیان وو او د غره په لمنه کې یې څاروي څرول.

د یادونې ده، مخکې له دې هم څو ځلې په غور کې له تېرو جګړو پاتې چاودېدونکو توکو له امله ماشومانو ژوند له لاسه ورکړی دی.