کابل (پژواک، ۸ زمری ۱۴۰۴): د اروزګان ولایت دهراوود ولسوالۍ کې د لس میلیون افغانیو په لګښت د پاکو اوبو رسولو یوه شبکه جوړه او ګټې اخیستنې ته وسپارل شوه.
د یاد ولایت د کلیو د بیارغونې او پراختیا ریاست اداري مدیر، ننګیالي حبیبي نن په دې اړه جوړه شوې غونډه کې وویل چې یاده شبکه د کلیو د بیارغونې او پراختیا ریاست تر چتر لاندې، د (ECHO) موسسې په مالي ملاتړ جوړه شوې ده.
حبیبي زیاته کړه، چې په لمریزې برېښنا سمبال د دې شبکې په جوړېدو سره، به د یادې ولسوالۍ د دورشانک سیمې ۶۹۹ کورنۍ پاکو اوبو ته لاسرسی پیدا کړي.
ده وویل چې په یاده شبکه شاوخوا لس میلیون افغانۍ لګښت راغلی دی.
د امان الله په نوم د دورشانک سیمې یوه اوسېدونکي پژواک اژانس ته وویل، چې د څښاک لپاره یې پاکې اوبه نه لرلې.
نوموړي زیاته کړه، چې د همدې له امله د سیمې اوسېدونکي د ویالې له اوبو استفاده کوله، چې زیاتره وخت به له بېلابېلو ناروغیو سره مخ کېدل.
ده دغه راز د ورته یو شمېر نورو پروژو د پلې کېدو غوښتنه هم وکړه.
