اقتصادي معاونیت: په هېواد کې د ۲۰۴ کانونو د اکتشاف او استخراج چارې روانې دي

کابل (پژواک، ۲۵ زمری ۱۴۰۴): د ریاست‌الوزرا اقتصادي معاونیت وایي چې اوسمهال په هېواد کې د لوی مقیاس ۲۹ او د کوچني مقیاس ۱۷۵ کانونو د اکتشاف او استخراج چارې روانې دي چې شاوخوا ۱۷۰ زره کسانو ته په‌کې د کار زمینه برابره شوې ده.

د ریاست‌الوزار اقتصادي معاونیت نن په یوه خبرپاڼه کې لیکلي چې اوسمهال په هېواد کې د لوی مقیاس ۲۹ او کوچني مقیاس ۱۷۵ کانونو د اکتشاف او استخراج چارې روانې دي.

سرچینې زیاته کړې، په دغو کانونو کې سرپنټین، کرومایټ، تالک، سره زر، ګچ، چونه، آهک، نفرایټ، مرمر، مالګه، سرب، جست، کلیسټ، رخام، ټراورټین، د ډبرو سکاره، یاقوت، د سیمنټو خام مواد، باریت، اوسپنه، مس او داسې نور منرالونه شامل دي.

د سرچینې د معلوماتو له مخې، د کانونو په پروژو کې په مجموعي ډول شاوخوا ۱۷۰ زره هېوادوال په مستقیم او غیرمستقیم ډول په کار بوخت دي.