د بلخ امنیه قومانداني: چهاربولک ولسوالۍ کې درې غله له مقاومت وروسته ووژل شول

مزارشریف (پژواک، د وږي لومړۍ نېټه ۱۴۰۴): د بلخ امنیه قومانداني وایي چې د دغه ولایت په چهاربولک ولسوالۍ کې درې وسله‌واله غله له امنیتي ځواکونو سره د نښتې پر مهال وژل شوي دي.

د بلخ د امنیې قوماندانۍ خبرپاڼه کې راغلي: «یاد غله یوه کور ته د غلا په موخه وراوښتي وو، مجاهدین په وخت خبر شول او اقدام یې وکړ چې له لنډ مقاومت وروسته درې تنه غله له منځه وړل شوي او یو هم له سیمې تښتېدلی چې د نیولو لپاره یې هڅې روانې دي.»

د سرچينې د معلوماتو له مخې، له وژل شوو غلو د دوو تومانچو په ګډون درې میله وسله او یو موټرسایکل ترلاسه شوي دي.

دا په داسې حال کې ده چې تېره شپه په هرات ولایت کې هم یو غل له امنیتي کسانو سره په نښته کې وژل شوی و.