میدانښار (پژواک، ۲۲ وږی ۱۴۰۴): د میدان وردګو ولایت د کلیو بیارغونې او پراختیا ریاست وایي چې د دغه ولایت په چک او سیداباد ولسوالیو کې د ۲۳.۷ میلیونو افغانیو په لګښت د څښاک اوبو درې شبکې جوړې او ګټې اخیستنې ته وسپارل شوې.
د میدان وردګو ولایت د کلیو بیارغونې او پراختیا ریاست مطبوعاتي مسوول عبدالله ژمن پژواک خبري آژانس ته وویل، د څښاک پاکو اوبو یادې شبکې د سیدآباد ولسوالۍ د «خواجه غړومبان» او «بهادر خېلو» او همدارنګه د چک ولسوالۍ د «لنګرډاګ» په سیمه کې د (DAKAAR) موسسې له لوري په یوه کال کې جوړې او ګټې اخیستنې ته وسپارل شوې.
نوموړي وویل، پر یادو شبکو څه د پاسه ۲۳.۷ میلیونه افغانۍ لګښت شوی چې د یادې موسسې له لوري ورکړل شوی دی.
هغه زیاته کړه، دا پروژې د کلیو د پرمختګ، روغتیا او دوامدار چاپېریال ساتنې په برخه کې مهم ګام بلل کېږي.
هغه همدارنګه وویل: «د اوبو رسولو په دغو درو شبکو کې درې ژورې څاګانې کېندل شوې دي، د سولر سیستمونه نصب شوي، د ۴۰ متر مکعب وړتیا لرونکي درې د اوبو زېرمې جوړې شوې، ۳۱۰ شیردهنونه وصل شوي او ۳۰۲۰۰ متره اوږد پایپ لګول شوی دی.»
ژمن زیاته کړه، د دې پروژو پر مهال سلګونو کسانو ته د کار زمینه برابره شوې وه او له بشپړېدو سره یې د یادو سیمو ۶۴۹ کورنیو د څښاک پاکو اوبو ته لاسرسی موندلی دی.
باید وویل شي، چې له دې وړاندې هم د (DAKAAR) موسسې له لوري د څښاک پاکو اوبو ورته یو شمېر نورې شبکې جوړې شوې وې، چې له پرانېستې سره یې زرګونو کورنیو ته د څښاک پاکو اوبو په برخه کې اسانتیاوې رامنځته شوې دي.
GET IN TOUCH
NEWSLETTER
SUGGEST A STORY
PAJHWOK MOBILE APP