سمنګان کې د ترافیکي پېښې له امله درې کسان مړه او دوه نور ټپیان شوي

ایبک (پژواک، ۲۲ وږی ۱۴۰۴): سمنګان کې ځايي مسوولین وايي چي د دغه ولایت په دره‌صوف پایین ولسوالۍ کې د یوې ترافیکي پېښې له امله درې کسان مړه او دوه نور ټپیان شوي دي.

د سمنګان د امنیې قوماندانۍ ویاند حشمت‌الله رحماني پژواک خبري اژانس ته وویل چې یاده پېښه تېره شپه د دره‌صوف پایین ولسوالۍ د مرکز مربوطاتو کې شوې ده.

د هغه په وینا، یو «فوررنر» موټر چې د دره‌صوف پایین ولسوالۍ له مرکزه د «ګوله» کلي ډبرو سکرو کان پر لور روان و، د ډېر سرعت له امله د چلوونکي له کنټرول وتلی او چپه شوی دی.

رحماني زیاته کړه چې په دې پېښه درې کسان مړه او دوه نور ټپيان شوي دي.

هغه زیاته کړه چې پولیس د پېښې څېړنې لپاره سیمې ته رسېدلي، ټپیان لومړی د دره‌صوف پایین ۲۰ بستریز روغتون او وروسته د مزارشریف روغتون ته لېږدول شوي دي.