کابل (پژواک، ۷ لړم ۱۴۰۴): د افغانستان کرکټ بورډ وایي چې د هېواد ملي لوبډله له زمبابوې سره د درېیو شلاوریزو نړۍوالو سیالیو د لوبلړۍ لومړۍ لوبه نن ترسره کوي.
د افغانستان کرکټ بورډ ویلي چې افغان لوبډله به نن د افغانستان پر وخت د مازدیګر څلور بجې د درېیو شلاوریزو نړۍوالو سیالیو په لومړۍ لوبه کې د کوربه زمبابوې لوبډلې پر وړاندې د سیالۍ ډګر ته کښته شي.
کرکټ بورډ زیاته کړې، د افغانستان کرکټ ملي لوبډلې له زمبابوې سره د لوبې ترسره کولو لپاره د چمتووالي په موخه پرون تمرینات ترسره کړل.
دغهراز، افغان لوبډله به له زمبابوې سره خپله دویمه لوبه د اکټوبر په ۳۱مه او درېیمه به بیا د نومبر په دویمه ترسره کړي.
د یادونې ده، د افغانستان کرکټ ملي لوبډلې له دې مخکې زمبابوې ته ټيسټ لوبه بایللې ده.
GET IN TOUCH
NEWSLETTER
SUGGEST A STORY
PAJHWOK MOBILE APP