د زابل امنیه قوماندان د ډیورنډ پر فرضي کرښه له امنیتي پوستو لیدنه وکړه

کابل (پژواک، ۱۳ لړم ۱۴۰۴): د کورنیو چارو وزارت اعلان کړی چې د زابل امنیه قوماندان د سرتېرو د وضعیت او شته امکاناتو ارزونې په موخه د شملزو ولسوالۍ له امنیې قوماندانۍ او د ډیورنډ پر فرضي کرښه له امنیتي پوستو لیدنه کړې ده.

د کورنیو چارو وزارت پر اېکس‌پاڼه لیکل شوي چې د زابل امنیه قوماندان مولوي عبدالحلیم حلیمي له مل پلاوي سره د شملزو ولسوالۍ له امنیې قوماندانۍ او د ډیورنډ د فرضي کرښې له پوستو لیدنه کړې او د سرتېرو حالت او شته امکانات یې له نږدې ارزولي دي.

سرچینې لیکلي چې حلیمي د ديوړند پر فرضي کرښه د سرتېرو روحیه مثبته ارزولې او هغوی ته یې ډاډ ورکړی چې حکومت او خلک د هغوی ترڅنګ ولاړ دي.