اقتصادي معاونیت: اریانا افغان هوایي شرکت چې څومره ژر کېږي یوه کارګو الوتکه دې وپېري

کابل (پژواک، ۱۴ لړم ۱۴۰۴): د ریاست‌الوزرا اقتصادي معاونیت وایي، د اریانا افغان هوایي شرکت ته سپارښتنه وشوه چې یوه کارګو الوته ژر وپېري او له دې وروسته دې صادراتي سوداګریز توکي یو کیلوګرام په یو ډالر او وارداتي دې یو کیلوګرام په ۸۰ سینټه انتقال کړي.

د ریاست‌الوزرا اقتصادي معاونیت خبرپاڼه کې راغلي چې تېره ورځ د ملا عبدالغني برادر په مشرۍ د اړوندو وزارتونو او ادارو له استازو سره د هوایي کارګو له لارې بهرنیو هېوادونو ته د افغانستان د سوداګریزو توکو، په ځانګړې توګه د وچې او تازه مېوې د صادراتو په اړه دویمه تعقیبي غونډه ترسره شوه.

خبرپاڼه کې راغلي، په دې غونډه کې د اریانا افغان هوایي شرکت ته هدایت وشو چې له دې وروسته في کیلوګرام صادراتي سوداګریز توکي په یو ډالر او في کیلوګرام وارداتي سوداګریز توکي په ۸۰ سينټه انتقال کړي.

په یاده غونډه کې د مالیې او ترانسپورټ او هوایي چلند وزارتونو ته هم هدایت شوی چې د اریانا افغان هوایي شرکت ته په خپلو فیسونو کې ۹۰ سلنه تخفیف ورکړي.

اقتصادي معاونیت لیکلي چې د اریانا افغان هوایي شرکت ته همدا راز هدایت وشو چې څومره ژر ممکنه وي یوه کارګو الوتکه وپېري.