کابل (پژواک، ۱۸ لړم ۱۴۰۴): د افغانستان کرکټ بورډ وايي چې د بُست لوبډلې د زونونو په کچه د معلولینو د کرکټ څوارلسم پړاو شلاوریزو سیالیو اتلولي خپله کړه.
د افغانستان کرکټ بورډ نن په یوه خبرپاڼه کې ویلي، د بُست لوبډلې د زونونو په کچه د سوپر کولا جام نجیبالله ترهکي د معلولینو شلاوریزو سیالیو د ۱۴م پړاو د اتلولۍ جام په خپل نوم کړ.
سرچینې لیکلي، د زونونو په کچه د سوپر کولا جام نجیبالله ترهکي معلولینو شلاوریزو سیالیو ۱۴م پړاو د هېواد د پنځو زونونو بُست، مس عینک، سپینغر، امو او بندامیر لوبډلو ترمنځ په کندهار کې پیل شوې وې چې د دې لوبو پایلوبې ته مس عینک او بُست لوبډلو لار موندلې وه.
کرکټ بورډ زیاته کړې چې د یادو سیالیو په پایلوبه کې بُست لوبډلې لومړی توپوهنه ترسره کړه او په ټاکل شوو شلو اورونو کې یې د شپږو لوبغاړو په سوځېدو ۱۷۵ منډې وکړې.
د مس عینک لوبډلې ورکړل شوی هدف پوره نه کړای شو او په شلو اورونو کې د اتو لوبغاړو په سوځېدو یې ۱۷۰ منډې وکړې او د پنځو منډو په توپیر یې د بُست لوبډلې ته لوبه وبایله.
د یادونې ده، د مس عینک لوبډلې لوبډلمشر جمیل شاه د یادو سیالیو د غوره لوبغاړي او د دې لوبډلې بل لوبغاړی فرید بیا د دغو سیالیو د ځوان لوبغاړي په توګه ونومول شول.
GET IN TOUCH
NEWSLETTER
SUGGEST A STORY
PAJHWOK MOBILE APP