کابل (پژواک، ۲۴ لړم ۱۴۰۴): د افغانستان د کرکټ الف لوبډله (افغان ابدالیان) د ځوانانو اسیا جام سیالیو په لړ کې نن خپله لومړۍ لوبه د سریلانکا له الف لوبډلې سره ترسره کوي.
د ځوانانو شلاوریزې اسیا جام سیالۍ پرون د قطر په کوربهتوب د افغانستان په ګډون د اتو هېوادونو د لوبډلو ترمنځ پیل شوې چې د همدې میاشتې تر ۲۳مې به دوام ولري.
د افغانستان د کرکټ بورډ ویاند سیدنسیم سادات پژواک خبري اژانس ته وویل چې د هېواد د کرکټ الف (افغان ابدالیان) او د سریلانکا الف لوبډلو ترمنځ لوبه نن د افغانستان پر وخت د مازدیګر څلور بجې ترسره کېږي.
افغان لوبډله د دغو سیالیو په الف ګروپ کې د سریلانکا، بنګلهدېش او هانګکانګ له لوبډلو سره په یوه ګروپ کې لوبېږي.
د یادونې ده، افغان ابدالیان لوبډله به په دغو سیالیو کې خپله دویمه لوبه د نومبر په ۱۷مه د بنګلهدېش له الف لوبډلې سره او وروستۍ ګروپي لوبه به د همدې میاشتې په ۱۹مه د هانګکانګ پر وړاندې ترسره کړي.
GET IN TOUCH
NEWSLETTER
SUGGEST A STORY
PAJHWOK MOBILE APP