نيمروز کې د لسګونه قلمه تاريخي اثارو د قاچاق مخه ونيول شوه

زرنج (پژواک، ۲۶ لړم ۱۴۰۴): په نیمروز کې سیمه‌ییزې سرچینې وايي چې امنیتي ځواکونو په دغه ولایت کې د زرنج – دلارام پر لویه لار ۴۸ قلمه تاریخي اثار کشف او ضبط کړي دي.

د نیمروز د اطلاعاتو او فرهنګ رییس مفتي حبیب‌الله الهام وايي: «۴۸ قلمه تاریخي اثار چې د مختلفو دورو اړوند دي، د دغه ولایت د لویې لارې د کنډک د امنیتي پرسونل له لوري کشف او ونیول شول او نن د دغه ولایت د اطلاعاتو او فرهنګ ریاست سیمه‌ییز موزیم ته وسپارل شول.»

هغه زیاته کړه چې د فرهنګي او تاریخي اثارو د غصب، تخریب او غیرقانوني پېر او پلور د مخنیوي لپاره د امنیتي بنسټونو ترمنځ جدي همغږي شتون لري او د اسلامي امارت د رهبر د فرمان له مخې، هیچا ته اجازه نه ورکول کېږي چې دغه اثار قاچاق یا ویجاړ کړي.