<p style="text-align: justify;">کابل (پژواک، ۹ لېندۍ ۱۴۰۴): د اسیا او اروپا لپاره د ډنمارک د سره صلیب ساحوي مسوولې د افغاني سرې میاشتې ټولنې له رییس سره په لیدنه کې ویلي چې ډنمارک د افغانستان د خلکو ملاتړ ته ژمن دی او په پام کې لري چې د افغاني سرې میاشتې له لارې افغانانو ته لا ډېرې مرستې وړاندې کړي.</p>
<p style="text-align: justify;">د افغاني سرې میاشتې ټولنې خبرپاڼه کې راغلي چې د دې ټولنې عمومي رییس شهابالدین دلاور د اسیا او اروپا لپاره د ډنمارک سره صلیب له ساحوي مسوولې مېرمن جوهانا او په افغانستان کې د دې ادارې له مسوول محمد شمع سره د همکاریو او ګډو بشري خدمتونو په اړه ناسته ترسره کړه.</p>
<p style="text-align: justify;">دلاور ویلي چې د دواړو بنسټونو ګډې هڅې کولای شي په افغانستان کې د بشري مرستو کیفیت او اغېزمنتیا لا نوره پیاوړې کړي. هغه ټینګار کړی چې افغاني سره میاشت له هر هغه ګډ بشري پروګرام څخه هرکلی کوي چې د خلکو د ژوند د ښهوالي لامل کېږي.</p>
<p style="text-align: justify;">بلخوا، د اسیا او اروپا لپاره د ډنمارک سره صلیب ساحوي مسوولې په خپلو خبرو کې ویلي چې د ډنمارک سور صلیب د افغانستان د خلکو ملاتړ ته ژمن دی او په پام کې لري چې د افغاني سرې میاشتې له لارې افغانانو ته لا ډېرې مرستې وړاندې کړي او هغوی ته رسېدنه وکړي.</p>
<p style="text-align: justify;">هغې د افغاني سرې میاشتې ټولنې د فعالیتونو د ستاینې ترڅنګ ژمنه کړې چې د کونړ زلزلهځپلو لپاره به د ژمي مرستې برابرې کړي.</p>
