افغان او ترکي چارواکو د دوه اړخیزو اړيکو او متقابل تفاهم پر پیاوړتیا خبرې کړي

کابل (پژواک، ۱۱ لېندۍ ۱۴۰۴): په کابل کې د ترکیې سفیر د افغانستان د بهرنیو چارو وزارت له مرستیال سره د مخه‌ښې په لیدنه کې ویلي، له افغانستان سره اړیکو ته ځانګړی اهمیت ورکوي او له افغانانو سره هر ډول همکارۍ ته ژمن دي.

د افغانستان د بهرنیو چارو وزارت په خبرپاڼه کې راغلي چې د دغه وزارت مالي او اداري مرستيال، دوکتور محمد نعیم په کابل کې د ترکیې له سفیر جنک اونال سره مخه‌ښې لیدنه وکړه.

خبرپاڼه کې راغلي،  په دې لیدنه کې د دواړو هېوادونو ترمنځ د اړيکو پر پیاوړتیا، متقابل تفاهم او د هر اړخيزو همکاریو په پراختیا بحث وشو.

دوکتور محمدنعیم د  جنک اونال د ماموریت پر مهال، د نوموړي له ښې همغږۍ او مثبت رول څخه مننه کړې او د افغانستان او ترکیې ترمنځ يې تاریخي، فرهنګي، مذهبي او سیاسي اړيکې ژورې بللي او د راتلونکي لپاره يې د لاپراخو همکاریو هیله څرګنده کړې.

جنک اونال هم ویلي، هېواد یې له افغانستان سره اړیکو ته ځانګړی اهمیت ورکوي او له افغانانو سره د هر ډول ملاتړ او همکارۍ لپاره ژمن دی.

بهرنیو چارو وزارت لیکلي، په پای کې دواړو لورو د اړيکو او متقابلو همکاريو پر دوام ټينګار وکړ.