چاریکار (پژواک، ۱۶ لېندۍ ۱۴۰۴): د افغانستان د برېښنا شرکت وایي چې د پروان ولایت د باریکاب صنعتي پارک لپاره د نږدې ۳۶۰ میلیون افغانیو په ارزښت د سبسټېشن جوړولو پروژه منظور شوه.
د افغانستان برېښنا شرکت پر خپله اېکسپاڼه لیکلي، د پروان د باریکاب صنعتي پارک کې د ۲۲۰/۲۰ کیلوولټ سبسټېشن جوړولو پروژه چې د هېواد په صنعتي وده او برېښنا شبکې پیاوړتیا کې اساسي ونډه لري، د ا.ا اقتصادي کمېسیون له خوا د نږدې ۳۶۰ ميليون افغانيو په ټوليز لګښت رسما تایيد او منظور شوه.
خبرپاڼه کې راغلي، د دې سترې پروژې تخنيکي اسناد لا له وړاندې د افغانستان برېښنا شرکت د برنامو رياست له لوري ترتيب شوي وو.
د سرچینې د معلوماتو له مخې، په دې پروژه کې د ١٢٦ ميګاولټ امپير په ظرفيت د دوو ترانسفرمرونو (هر یو د ٦٣ ميګاولټ امپیر په ظرفیت) او د ۱۲ خروجي فيډرونو جوړول او نور شامل دي.
د افغانستان برېښنا شرکت لیکلي، ټاکل شوې د باريکاب سبسټېشن پروژې چارې به له تړون وروسته په نږدې ۱۸ کاري مياشتو کې بشپړې شي.
خبرپاڼې له مخې، د دې پروژې له بشپړېدو سره به نه يوازې د پروان صنعتي پارک، بلکې ګڼو هستوګنيزو کورونو، سوداګريزو مرکزونو، روغتيايي ادارو او نورو اړوند برخو ته دوامداره برېښنا برابره شي.
GET IN TOUCH
NEWSLETTER
SUGGEST A STORY
PAJHWOK MOBILE APP