کابل (پژواک، ۱۸ لېندۍ ۱۴۰۴): د ریاستالوزرا اقتصادي معاونیت وایي چې د کاني توکو د کیفیت معلومولو لپاره د ۲۳۳ میلیون افغانیو په ارزښت پرمختللي لابراتوارونه جوړېږي.
د ریاستالوزرا اقتصادي معاونیت نن په یوه خبرپاڼه کې لیکلي چې د اقتصادي کمېسیون د تخنیکي کمېټې نوبتي غونډه ترسره شوه.
سرچینې زیاته کړې چې په غونډه کې د کانونو او پټرولیم وزارت له لوري په کابل او ولایتونو کې د کاني توکو د کیفیت معلومولو لپاره د پرمختللو لابراتوارونو جوړېدو موضوع وړاندې شوه چې له هر اړخیز بحث وروسته یاده موضوع د تایید وړ وبلل شوه او د نهايي تصمیم په موخه اقتصادي کمېسیون ته راجع شوه.
اقتصادي معاونیت زیاته کړې، د دغو لابراتوارونو لپاره ۲۳۳ میلیون افغانۍ بودجه په پام کې نیول شوې چې ۱۵ میلیونه به یې په ساختماني چارو کې او ۲۱۸ میلیونه نورې به د تجهیزاتو برخه کې ولګول شي.
د سرچینې د معلوماتو له مخې، دغهراز په یاده غونډه کې پر یو شمېر نورو موضوعاتو هم بحث وشو او په اړه یې لازم تصمیمونه ونیول شول.
GET IN TOUCH
NEWSLETTER
SUGGEST A STORY
PAJHWOK MOBILE APP