کابل (پژواک، ۲ مرغومی ۱۴۰۴): د امر بالمعروف، نهي عنالمنکر او د شکایتونو اورېدو وزارت وایي چې د دغه وزارت منسوبینو په تېرو درېیو میاشتو کې نږدې شپږ زره رواني ناروغان له پېژندلو وروسته د سرې میاشتې ریاستونو ته معرفي کړي دي.
شاوخوا درې میاشتې مخکې د اسلامي امارت مشرتابه د رواني ناروغانو د تخصصي درملنې زمینې برابرولو په موخه د امر بالمعروف وزارت مسوولینو او منسوبینو ته د یوه حکم له لارې سپارښتنه وکړه څو پر رواني اختلالاتو اخته ناروغان وپېژني او د درملنې لپاره یې د افغاني سرې میاشتې ټولنې ریاستونو ته ور معرفي کړي.
د امر بالمعروف وزارت نن په یوه خبرپاڼه کې لیکلي چې د یاد حکم له صادرېدو وروسته د دغه وزارت منسوبینو د رواني ناروغانو د پېژندنې بهیر پیل کړ چې په پایله کې یې تر اوسه په ټول هېواد کې ۵۷۸۱ رواني ناروغان پېژندل شوي او د روغتیايي مراقبتونو لپاره د افغاني سرې میاشتې ریاستونو ته سپارل شوي دي.
د امر بالمعروف وزارت ویاند مولوي سیفالاسلام خیبر ویلي چې د افغاني سرې میاشتې ریاستونو همکاري او د دغه وزارت د منسوبینو هڅې د دې لامل شوې څو روغتیايي خدمتونو ته د رواني ناروغانو د لاسرسي زمینه برابره شي.
هغه ډاډ ورکړی چې د رواني ناروغانو د درملنې بهیر په جدي ډول دوام لري او هڅه کېږي چې هغوی ته اړین خدمتونه وړاندې شي.
GET IN TOUCH
NEWSLETTER
SUGGEST A STORY
PAJHWOK MOBILE APP