فراه (پژواک، ۱۰ مرغومی ۱۴۰۴): په فراه کې امنیتي سرچینې وایي چې په دغه ولایت کې په سېلابونو کې لسګونه بند پاتې کسان د ژغورنې ټیمونو له خوا ژغورل شوي دي.
د فراه د امنیې قوماندانۍ ویاند مولوي محمدنسیم بدري وویل چې د دغه ولایت امنیتي ځواکونو د ۲۰۷ الفاروق قولاردو د لوېدیځ زون د ځمکنیو او هوايي ځواکونو په همکارۍ د فراه ښار مرکز اړوند قرغزرد او دزدک سیمو کې د عملیاتو پر مهال په درېیو الوتنو کې په سېلابونو کې بند پاتې شاوخوا ۲۰۰ کسان ژغورلي او خوندي ځایونو ته یې لېږدولي دي.
ورته مهال، د فراه د عامې روغتیا رییس مولوي شیخ میرصدام وویل چې په یادو سیمو کې مجهز روغتیايي ټیمونه حاضر وو او ژغورل شوو کسانو ته یې روغتیايي خدمات وړاندې کړي دي.
د سرچینو د معلوماتو له مخې، د فراه په وروستیو سېلابونو کې د مالي زیانونو ترڅنګ یو کس ژوند له لاسه ورکړی او څو نور ټپیان شوي دي.
GET IN TOUCH
NEWSLETTER
SUGGEST A STORY
PAJHWOK MOBILE APP