سږ کال له کندهاره ترکیې او ځینو نورو هېوادونو ته ۲۵۰۰ کیلوګرامه شات صادر شوي

کندهار (پژواک، ۱۸ مرغومی ۱۴۰۴): د کندهار د کرنې او مالدارۍ ریاست وایي چې سږ کال له دغه ولایت ترکیې او ځینو نورو هېوادونو ته ۲۵۰۰ کیلوګرامه شات صادر شوي دي.

د کندهار د کرنې او مالدارۍ ریاست د حشراتو برخې اقتصادي متخصص، ډاکټر عبدالوارث حقمل پژواک خبري اژانس ته وویل چې روان لمریز کال د دغه ولایت د مچیو له فارمونو څخه ۵۶ ټنه شات تر لاسه شوي دي.

هغه د جزییاتو له ورکولو پرته وویل، له دې شاتو څخه دوه نیم ټنه یې د لومړي ځل لپاره ترکیې او ځینو نورو هېوادونو ته صادر شوي دي.

حقمل وویل: «سږ کال د لومړي ځل لپاره ترکیې او یو څو نورو هېوادونو ته له کندهاره دوه نیم ټنه عسل صادر شوی دی، چې دا د ریحان ګل عسل دي او خلک یې ډېر مینه وال دي. دا عسل د شرکتونو له خوا صادر شوی او هڅه کوو چې په بهر کې د افغانستان د عسلو لپاره نور هم بازار پیدا کړي.»

هغه زیاته کړه چې په کندهار کې د عسلو فارمونه شاوخوا سل ته رسیږي، خو دغه فارمونه د هوا له بدلون سره په بېلابېلو وختونو کې ځینو نورو ولایتونو ته هم لېږدول کېږي چې ځینې وخت زیاتوالی او کموالی په کې راځي.

د کندهار د مچیو فارم لرونکي وایي، که چیرې د عسلو د بسته‌بندۍ او بازارموندنې په برخه کې کار وشي، د کندهار شات به نور هم ښه بازار پیدا کړي، چې دا به د سوداګرو تر څنګ د فارم لرونکو پر اقتصاد هم ډېر ښه اغېز ولري.

د کندهار د ډنډ ولسوالۍ د مچیو د یوه فارم مسؤل عبدالباري وویل: «موږ څو کاله کېږي چې د مچیو په برخه کې کار کوو، نورو ته مو هم روزنه ورکړې ده، خو زموږ غوښتنه هر وخت د بازار په اړه ده. که عسل ښه بازار ولري او د بهرنیو نامعلومه عسلو مخنیوی وشي، موږ هر څومره عسل تولیدولی شو.»

د مچیو د یوه بل فارم مسؤل محمد عمر وویل چې مسوولین باید د مچیو د درملو او فارمونو لپاره د نورو اړینو وسایلو په برخه کې همکاري وکړي، ځکه لا هم د ډېرو کسانو مچۍ له منځه ځي چې هغوی په دې برخه کې مسلکي روزنه او اړین وسایل نه لري.

ده زیاته کړه: «موږ څو واره مچۍ مړې شوې وې، نه پوهېدو چې څه وکړو، خو بیا په دې برخه کې مسلکي کسانو مرسته راسره وکړه. نو موږ غوښتنه کوو چې د فارمدارانو سره د وسایلو مرسته وشي او روزنه ورکړل شي، تر څو هغوی له فارمونو لاس وانخلي.»

په کندهار کې تر ډېره د عسلو ډول د ریحان ګل دی، خو یوه اندازه د لاچي یا ولي عسل هم له مچیو څخه تولیدیږي. د ریحان ګل عسل یو کیلوګرام له ۴۰۰ تر ۶۰۰ افغانۍ پورې بیه لري، خو د نورو ګلانو شاتو بیه تر دې ټيټه ده.