د کرکټ ملي لوبډلې لپاره نوي روزونکي وګومارل شول

کابل (پژواک، ۲۳ مرغومې ۱۴۰۴): د افغانستان کرکټ بورډ وایي، د کرکټ ملي لوبډلې لپاره یې د توپوهنې او فزیکي تکړښت په برخه کې نوي روزونکي ګومارلي دي.

د افغانستان کرکټ بورډ د خبرپاڼې له مخې، د انګلستان مجرب روزونکی ټابي راډفورډ د توپوهنې د نوي روزونکي او د همدې هېواد بل نوموتی روزونکی رابرټ اهمن د فزیکي تکړښت د روزونکي په توګه ټاکل شوي دي.

کرکټ بورډ ویلي، ټابي راډفورډ د انګلستان کرکټ بورډ د څلورمې درجې (ECB Level 4) روزونکی دی او په دې برخه کې اوږده مخینه او پراخه تجربه لري.

سرچینه زیاتوي چې رابرټ اهمن په دې وروستیو کې د انګلستان کرکټ بورډ د کړنو د ساینسي څېړنې او طبي برخې د مشر په توګه دنده ترسره کړې ده.

د خبرپاڼې له مخې، یاد روزونکي به د ویسټ‌انډیز پر وړاندې د راتلونکې شل اوریزې لوبلړۍ له پیل وړاندې له افغان لوبډلې سره یو ځای شي.

ټاکل شوې یاده لوبلړۍ د روانې جنوري په ۱۹مه، ۲۱مه او ۲۲مه په متحده عربي امارتو کې تر سره شي.