شبرغان، غزني (پژواک، ۲۹ سلواغه ۱۴۰۴): ځایي مسوولین وايي چې په غزني او جوزجان ولایتونو کې د اوبو رسولو درېيو شبکو جوړولو چارې پیل شوې دي.
د جوزجان د کلیو بیارغونې او پراختیا ريیس مولوي اسدالله حمزه وایي، د دغو پروژو جوړولو چارې د ۱۵۷ زره او ۶۵ امریکایي ډالرو په لګښت، د مرستندویو بنسټونو په همکارۍ د اقچې ولسوالۍ او د شبرغان ښار په اړوندو سیمو کې پیل شوې دي.
نوموړی زیاتوي، دغه پروژې د آقچې ولسوالۍ د «بېشکپهسرخ» کلي او د شبرغان ښار د «غزګي» کلي کې د AHF نړیوالې خیریه موسسې په مالي ملاتړ پلې کېږي او عملي چارې یې د (واک) موسسه پر مخ وړي.
د جوزجان د کلیو بیارغونې او پراختیا ريیس وایي، دا د اوبو رسولو شبکې د لمریزې برېښنا سیسټم له لارې او کور په کور جوړېږي چې په بشپړېدو سره به شاوخوا زر کورنۍ د څښاک پاکو اوبو ته لاسرسی ومومي.
د هغه په وینا، په دغو پروژو کې د سیمې د ښوونځیو او دیني مدرسو لپاره د ۲۰ تشنابونو جوړول هم شامل دي.
په همدې حال کې، د جوزجان والي مولوي عبدالله سرحدي وایي، اسلامي امارت د هېواد په کچه د خلکو د اساسي اړتیاوو د پوره کولو په موخه د عامه ګټو پروژو پلي کولو ته ژمن دی.
نوموړی زیاتوي، اسلامي امارت هڅه کوي چې د عامه ګټو پروژې په بېلابېلو برخو، په ځانګړي ډول د اوبو رسولو په برخه کې پلې کړي، څو د خلکو اساسي ستونزې راکمې او د لومړنیو خدمتونو ته د لاسرسي زمینه برابره شي.
همدارنګه، د غزني ولایت د کلیو بیارغونې او پراختیا ریاست د ټولنیزو چارو عمومي مدیر ملا محمدرحیم هاشمي وایي، د دغه ولایت د ګیرو ولسوالۍ د شیلې کلي کې د اته میلیون افغانیو په لګښت د یوې د اوبو رسولو شبکې د جوړولو کار نن (چهارشنبه) په رسمي ډول پیل شو.
د هغه په وینا، دا پروژه د خلکو د اړتیاوو او غوښتنو پر بنسټ طرحه او پلې کېږي.
نوموړی زیاتوي، په دې پروژه کې د ۱۲۰ مترو په ژوروالي د یوې څاه کیندل، د ۲۰ مترمکعب په ظرفیت د اوبو زېرمې جوړول، د ۱۲ زره متره پایپ غځول او د ۱۳۳ نلکو نصب شامل دي.
د هاشمي په وینا، د دې پروژې پلې کېدو پر مهال به لسګونو ځایي کارګرانو ته د کار زمینه برابره شي او له بشپړېدو وروسته به د ګیرو ولسوالۍ د شیلې کلي ۳۲۲ کورنۍ د څښاک پاکو اوبو ته لاسرسی ومومي.
GET IN TOUCH
NEWSLETTER
SUGGEST A STORY
PAJHWOK MOBILE APP