په لبنان کې د اسراییلو په بریدونو کې ۱۲ روغتیايي کارکوونکو ژوند له لاسه ورکړ

<p style="text-align: justify;">کابل (پژواک، ۲۵ کب ۱۴۰۴): د روغتیا نړیوال سازمان وایي، په تېرو ۲۴ ساعتونو کې په لبنان کې د اسراییلو د بریدونو له امله ۱۲ روغتیايي کارکوونکو ژوند له لاسه ورکړی دی.</p>

<p style="text-align: justify;">د رویټرز خبري اژانس د راپور له مخې، د روغتیا نړیوال سازمان ویلي چې د جمعې په ورځ ناوخته د لبنان د برج قلاویه د لومړنیو روغتیايي پاملرنو پر مرکز د برید په پایله کې ۱۲ ډاکټرانو، یوه روغتيايي کارکوونکي او يوې نرسې ژوند له لاسه وړکړی دی.</p>

<p style="text-align: justify;">د روغتیا نړیوال سازمان مشر تدروس ادهانوم ګبریسوس ویلي چې دا پېښه په منځني ختیځ کې د مخ پر خرابېدونکي کړکېچ یو ډېر خواشینوونکی بدلون ښيي.</p>

<p style="text-align: justify;">په همدې حال کې الجزیرې راپور ورکړی چې دا برید اسراییلو کړی دی.</p>

<p style="text-align: justify;">د راپور له مخې، د لبنان د عامې روغتیا وزارت په یوه اعلامیه کې پر دغه مرکز د اسراییلو برید غندلی دی.</p>

<p style="text-align: justify;">یاد وزارت ټینګار کړی چې د روغتیايي کارکوونکو پر وړاندې تاوتریخوالی د نړیوالو بشردوستانه قوانینو له ټولو اصولو سره په ټکر کې دی.</p>

<p style="text-align: justify;">دا په داسې حال کې ده چې اسراییل له حزب‌الله لبنان سره په جګړه کې پر دغه هېواد پراخ بریدونه پیل کړي چې له امله یې د راپورونو له مخې تر اوسه له ۷۷۰ ډېر کسانو ژوند له لاسه ورکړی او سلګونه زره نور له خپلو کورونو بې‌ځایه شوي دي.</p>