د منځني ختیځ د جګړې د وژل شوو وروستی شمېر

کابل (پژواک، ۴ وری ۱۴۰۵): د راپورونو له مخې، د امریکا او اسرائیل له خوا پر ایران د جګړې له پیله راهیسې لږ تر لږه دوه زره او ۲۳۱ کسان په ایران، شاوخوا یو زرو او ۳۹ کسان په لبنان کې او ۶۰ کسان په عراق کې وژل شوي؛ همدارنګه ۱۶ کسان په اسرائیل او ۱۳ امریکایان هم وژل شوي دي.

رویټرز خبري اژانس په یوه راپور کې د روانې میلادي میاشتې تر ۲۳مې د امریکا او اسرائیل له خوا پر ایران د جګړې د تلفاتو شمېر خپور کړی دی.

په راپور کې ویل شوي چې پر ایران د امریکا او اسرائیل د بریدونو له پیله راهیسې په دغه هېواد کې دوه زره او ۲۳۱ کسان وژل شوي چې له ډلې یې یو زرو او ۴۰۷ ملکي وګړي او ۲۱۰ نور ماشومان دي.

رویټرز زیاته کړې چې دغه شمېرې یې د میداني راپورونو، سیمه‌ییزو اړیکو، روغتیايي سرچینو، د مدني ټولنو شبکو، پرانیستو سرچینو او رسمي اعلامیو له لارې ترلاسه کړې دي.

د راپور له مخې، لبناني چارواکو ویلي چې په دغه هېواد کې د اسرائیل د بریدونو په پایله کې شاوخوا یو زرو او ۳۹ کسان وژل شوي دي.

د روغتیا نړۍوال سازمان ویلي چې په لبنان کې د وژل شوو کسانو له ډلې لږ تر لږه ۱۰۰ ماشومان دي.

په راپور کې لیکل شوي چې لږ تر لږه ۶۰ کسان په عراق کې هم وژل شوي چې ډېری یې د ولسي بسیج ځواکونو غړي دي.

په همدې حال کې، رویټرز د اسرائیل د امبولانس خدمتونو له قوله ویلي چې د ایران توغندیزو بریدونو له امله په اسرائیل کې ۱۶ کسان وژل شوي دي.

د اسرائیل پوځ اعلان کړی چې د دغه هېواد دوه سرتېري هم د لبنان په سوېل کې وژل شوي دي.

د راپور له مخې، د امریکا متحده ایالتونو د پوځ ۱۳ غړي هم د دې جګړې په پایله کې وژل شوي دي.

خو د دې جګړې د ټپیانو په اړه په راپور کې کوم جزئیات نه دي وړاندې شوي.