د ټولګټو وزارت وايي چې د درې میلیون افغانیو په لګښت د کندوز – تخار لویې لارې د بیارغولو چارې پیل شوې.

د کډوالو او راستنېدونکو چارو وزارت وايي چې د پاکستان او عراق هېوادونو له زندانونو څه باندې ۴۰۰ افغان کډوال ازاد او هېواد ته راستانه شوي دي.

د کډوالو ستونزو ته د رسېدنې عالي کمېسیون د راپور له مخې، تېره ورځ نږدې ۱۵ زره افغان کډوالو په اجباري ډول هېواد ته راستانه شوي او د لېږد د لګښت په ګډون څه باندې ۴۵ میلیون افغانۍ مرسته هم ورسره شوې ده.

د افغانستان د فوټسال ملي لوبډله د تاجکستان پر وړاندې له بریا وروسته نن د اسلامي هېوادونو د پیوستون سیالیو په لړ کې خپله دویمه لوبه د ایران د فوټسال ملي لوبډلې پر وړاندې ترسره کوي.

خوست کې د دوو کورنيو ترمنځ ۲۹ کلنه دښمني چې له امله یې پنځه کسان وژل شوي وو، د ځايي چارواکو په منځګړيتوب پای ته ورسېده.
يادې کورنۍ د ځاځي ميدان ولسوالۍ د جبهې او باک ولسوالۍ د توتاک سيمې اوسېدونکې دي.

د افغانستان کرکټ بورډ وايي، د ۲۰۲۵ کال د ځوانانو اسیا جام سیالیو مهالوېش اعلان شوی چې له مخې یې، د افغانستان الف لوبډله (افغان ابدالیان) خپله لومړۍ لوبه د نومبر په ۱۵مه د سریلانکا الف لوبډلې پر وړاندې ترسره کوي.

د کورنیو چارو وزارت ویاند په خوست کې له خبریالانو سره یوه ناسته کې ویلي، رسنۍ باید تل د ملي ګټو او لوړو مصالحو په رڼا کې خپل فعالیتونه ترسره کړي او ډاډ یې ورکړی چې د ا.ا د شرعي اصولو مطابق به تل له رسنیو سره همکار پاتې شي.

د پروان امنیه قومانداني وایي، امنیتي ځواکونو په دغه ولایت کې د درېیو ښځو په ګډون پنځه کسان د یوه کس د قتل او د دوو ښځو په ګډون درې کسان د غلا په تور نیولي دي.

د عدلیې وزارت وایي چې د ځمکو د غصب مخنیوي او د غصب شوو ځمکو د استرداد کمېسیون په درېیو کلونو کې د لسګونو استوګنیزو ښارګوټو دوسیې تر څېړنې لاندې نیولې چې په پایله کې یې نهه ښارګوټي په بشپړ ډول امارتي (دولتي) تثبیت شوي دي.

د غزني امنیه قومانداني وایي چې د دغه ولایت په خوګیاڼو ولسوالۍ کې یو ماشوم د اوبو حوض ته لوېدلی او ژوند یې له لاسه ورکړی دی

قرغیزستان کې د چین سفیرې په دغه هېواد کې د اسلامي امارت له سرپرست سفیر سره په لیدنه کې ویلي چې د افغانستان ثبات او پرمختګ د ټولې سیمې لپاره حیاتي اهمیت لري.

د راپورونو له مخې، د سپینې ماڼۍ د ویاندې او متحده ایالتونو د ولسمشر دفتر ته نږدې ځینو دفترونو ته د خبریالانو پر ورتګ محدودیت لګول شوی دی.