د لېسې مدير له شنو لښتو سره يو ځای ټولګي ته ننوت، د ټولګي دروازه يې په زوره ټيل وهله ، زده کوونکو ته يې بې له ستړې مشې خپلې خبرې پيل کړې، لوړ اواز يې د ښوونځي په دهليز کې اورېدل کېده ، زده کوونکو ته يې تقريبا لس دقيقې د ستغو سپورو په ويلو او د درس د نه زده کولو په خبرو تېرې کړې، د خپلو خبرو په پای کې يې پر يوه زده کوونکي غږ کړ .
د فلانکي زويه مضمون مو څه شی دی ؟
زده کوونکي ځواب ورکړ، حساب
مدير بيا پرې غږ کړ ، ته راشه په تحته د حساب کلمه وليکه.
زده کوونکی تحتې ته راغی ، په رېږدېدلو لاسونو يې د حساب کلمه په دې ډول وليکله 🙁 حساب )
مدير په کړکۍ کې ايښودل شويو لښتو ته لاس کړ، د زده کوونکي په وهلو يې پيل وکړ ، تر دې چې د زده کوونکي بغارو ټول ښوونځی خبر کړ .
زه په منډه ټولګي ته ورغلم،
مدير ته مې وويل : څه خبره ده ، مدير په قهرجن غږ وويل ، دا د فلانکي زوی حساب نه شي ليکلی ، مدير تباشير راوخيست ، پر تحته يې وليکل ، ( حسوب)
وروسته يې ماته مخ را واړاوه ، راته يې وويل ( استاده ! په دې زده کوونکو زه نه يم ملامت ، درس نه زده کوي او چې بيا يې ووهم ، مور او پلار يې ګيلې هم راته کوي، ته او خدای حساب داسې ليکل کيږي (حساب) او که داسې (حسوب)
يادونه: دغه ليکنه د ليکوال د نظر څرګندويه ده، پژواک يې مسووليت نه اخلي.
