له کومې ورځې راهيسې چې د امريکا په ټاکنو کې د جمهوري خواهانو ګوند کانديد ډونالډ ټرمپ بريالى شوى ، پاکستان ته ځمکه سره تبۍ ګرځېدلې او د ارام خوب يې تښتېدلى دى.
پاکستان په دې باور و، چې په يادو ټاکنو کې به د ديموکراټ ګوند کانديده هيلري کلنټن چې د ولسمشر اوباما ملاتړ ورسره او ددغه هېواد د بهرنيو چارو وزيره هم پاتې شوې وه ، ددې ترڅنګ يې له پاکستان سره په زياترو سياسي لوبو او جنګي پروژو کې غاړه هم وړله، بريالۍ شي ، خو د پاکستان د ليدلي خوب معناسرچپه راووته او د راتلونکې لوبې پلانونه يې تر ډيره له ناڅرګند برخليک سره مخ شول .
پاکستان د مېرمن کلنټن د برياليتوب لپاره تل دا خوب ليده چې دوى به خپلو مضره لوبو ته پراختيا ورکړي ، په ځانګړې توګه د افغانستان پروړاندې او داسې به له بې پرسانه ډالرو او امتيازاتو برخمن وي لکه د تېرو درې لسيزو پرمهال چې د مجاهدينو په نامه له کېدونکو مرستو او پيسو څخه برخمن و او بيا له ٢٠٠٢ کال راهيسې چې د امريکا له ميلياردونو ډالرو پور اوپيمانه شول، خو د مېرمن کلنټن ناکامۍ پاکستان سربداله کړ ، فشار يې ټيټ او ان په سترګو يې توره شپه شوه او دا په دې خاطر چې د دوى سياسي ، نظامي ، اقتصادي او سرحدي لوبې له داسې کړکېچ سره مخ شوې چې هېڅکله يې تصور هم نه کاوه .
د ټرمپ برياليتوب د پاکستان شارګونه نيولي او هره لحظه يې له مرګ او نيم ژواندي ژوند سره مخ ده ، دوى نه پوهيږي چې اوس د ټرمپ برياليتوب ته چې دوى يې هېڅکله فکر هم نه کاوه، څه ډول پرتوګ وکړي ، ځکه چې ټرمپ او تر خوا يې راتاو نظامي او سياسي کړۍ ، د پاکستان نظام يو استفراغ شوى حکومت ګڼي او په تېرو ١٥کلونو کې يې د افغانستان په نا امنۍ ، جګړو، دوه مخۍ او لاسوهنو کې د پاکستان څټ ته ورته مخ ښه پېژندلي،تل يې ددې هېواد کړنې زهر بللي دي او پروړاندې يې د امريکا د جدي برخورد غوښتنه کړې ، خو دا چې ديموکراټانو او په ځانګړې توګه اوباما او لوړپوړو چارواکو يې له پاکستان سره د نارواو د جوال خوله نيولې وه ، نو د واکمنۍ ترپايه يې نه يواځې د پاکستان پروړاندې کوم اقدام ونه کړ ، بلکې د ډالرو سيل يې ورخوشې کړو او په هغو پيسو يې چې په ظاهر ا يې د ترهګرۍ پروړاندې د مبارزې په نامه ترلاسه کولې ، خو په حقيقت کې يې په دې پيسو په اسلام اباد ، لاهور او پينډۍ کې نوي سړکونه ، پارکونه او نظامي پوهنتونونه ډيزان کول او هغه پيسې يې له خيبر پښتونخوا څخه ښکته مصرفولې او بيا به يې کله کله د امريکا د خوښۍ او ريا کارۍ لپاره په قبايلي سيمو او وزيرستانونو کې د ترهګرۍ د ځپلو په نامه د عامو پښتنو په وژلو ، د کورونو په ورانولو لاس پورې کاوه او امريکا ته به يې ويل چې په فلانۍ او فلانۍ پښتنه سيمه کې يې دومره ورانکاري ووژل ، دومره يې ونيول چې ترڅو بيا ترې يو څه مردارې روپۍ ترلاسه کړي .
خو اوس چې ټرمپ د امريکا ولسمشر شوى او تر شاوخوا يې را چاپير نور مسوولين د پاکستان د کړنو ، لاسوهنو ، سياست او دوه مخۍ ضد دي اوس له پاکستان څخه لار ورکه ده چې د ټرمپ له ادارې سره څه ډول لوبه وکړي ، څه ډول يې لکه د امريکا د مخکني حکومت په څېر تېرباسي او څه ډول يو ټيم ددغه کار لپاره وټاکي ، که څه هم چې پاکستان د منافقت ، دوه مخۍ او تېر ايستلو په برخه کې ډيره تجربه او ماهرانه پاليسي لري او خپلې هڅې به له بېلابېلو لارو وکړي چې د ټرمپ ادارې ته ځان نږدې کړي ، خو داسې ښکاري چې د ټرمپ اداره د پاکستان په هرڅه ښه پوهيږي او له پاکستان څخه يې د وراستو او خوسا خوړو په څېر بد راځي.
ټرمپ د دفاع وزارت ، د استخباراتي ادارې مشرۍ او د ملي امنيت شورا ته يو شمېر داسې کسان د مشرانو په توګه ټاکلي او د ځينو نورو ګومارنه روانه ده چې هغوى په افغانستان او عراق کې د امريکايي جګړې مشران پاتې شوي او له همدې امله يې اوباما ته استعفاوې ورکړې وې ، چې دوى په افغانستان کې د پاکستان د لاسوهنو او د جګړې په تودولو کې د پاکستان د رول د بندولو او پرضد يې د اقدام کولو غوښتنه کوله ، خو اوباما يې خبرو ته اهميت نه ورکاوه ، چې بالاخره اړ شول چې هغه مهال دندې پرېږدي .
بله دا چې له ولسمشر اشرف غني سره د ټرمپ اوږدې خبرې او هغه ته د هر ډول همکاريو ډاډ ورکول او ددې ترڅنګ په دې نږدې ورځو کې د ټرمپ لخوا د هندوستان لومړي وزير نريندار مودي سره ټېلېفوني خبرې او هغه ته د سپينې ماڼۍ د سفر بلنه ورکول او د هند د مسايلو ترڅنګ له هغه سره د افغانستان په اړه خبرې کول ، هغه څه دي ، چې پاکستان يې د ګنګسيت تر پولې رسولى ، خوب يې تښتېدلى ، داسې شديدې تبې نيولى چې په ويښه پرتې وايي او هرې خواته ناحقه خوله اولاس اچوي ، خو يواځې دا حالت يې کفايت نه کوي ، بلکې اوس ورسره بايد افغانستان او نړيوال د پاکستان د هغو ظالمانه کړنو په اړه چې د افغانستان د خاورې ، حکومت او خلکو په حق کې يې کړي ، حساب وکړي او دنړيوالو نورمونو په رڼا کې ترې جبران وغواړي او په راتلونکي کې يې داسې وتړي ، چې بيا هېڅکله افغانستان ته خوله وانه چوي .
يادونه: دغه ليکنه د ليکوال د نظر څرګندويه ده، پژواک يې مسووليت نه اخلي.
