احمد صهیب حسرت

د اسرائیلو پارلمان داسې یو قانون تصویب کړی چې له مخې یې له فلسطیني کډوالو د م.م د ملاتړ ادارې فعالیت درول کېږي، خو ملګرو ملتونو دغه کار له نړۍوال قوانینو سرغړونه بللې او وایي چې دغه پرېکړه به بدې پایلې ولري.

په مالیزیا کې افغان سفیر د روسیې او منځنۍ اسیا هېوادونو له سفیرانو سره پر دوه اړخیزو اقتصادي او سیاسي اړیکو او د تعامل پر پراختیا کړې دي.

د افغانستان پخواني ولسمشر حامد کرزي، د پخلاینې مخکینۍ شورا رییس ډاکټر عبدالله او پاکستان، سعودي عربستان او عمان هېوادونو پر ایران د اسرائیلو د تېرې شپې برید غندلی، هغه یې له نړۍ‌والو قوانینو سرغړونه بللې او د کړکېچ پر مخنیوي یې ټینګار کړی دی.

د کابل امنیې قوماندانۍ ویاند وایي، د سینمای‌پامیر په سیمه کې د تېرې ورځې د چاودنې د چاودېدونکو توکو لېږدوونکی کس – چې له امله یې۱۱ تنه ټپیان او یو ماشوم وژل شوی – په ټپي حالت کې نیول شوی دی.

د افغانستان بهرنیو چارو وزارت د ترکیې په پلازمینه انقره ښار کې د هوایي صنایعو پر یوه شرکت برید غندلی او هیله یې څرګند کړې چې د ترکیې خلک او دولت بیا له ورته پېښو سره مخ نه شي.

د ترکیې د کورنیو چارو وزارت وایي چې انقرې ته نږدې د دغه هېواد د هوایي چلند صنعت پر یوې فابریکې د وسله‌والو برید کې لږ تر لږه پنځه تنه وژل شوي او ۲۲ نور ټپیان دي.

ستره محکمه وایي، په خوست ولایت کې اوو مجرمینو او لسو تورنو کسانو ته په عام محضر کې تعزیري سزا ورکړل شوه.

د افغانستان لپاره د م.م د سرمنشي ځانګړې استازې د ریاست‌الوزرا سیاسي مرستیال سره په لېدنه کې ویلي، یوناما به په نږدې راتلونکي کې په افغانستان کې د کوچنیو کاروبارونو د ودې لپاره د پورونو د ورکړې لړۍ پیل کړي.

د ریاست‌الوزرا سیاسي مرستیال د تخنیکي او مسلکي زده‌کړو ادارې له رییس سره ځوانانو ته د کار موندنې او بهرنیو هېوادونو ته د هغوی د کډوالۍ پر مخنیوي ټینګار کړی او ویلي یې دي چې اسلامي امارت ملت ته خدمت خپل مسؤولیت بولي.

کابینې د مالیې وزارت د دویمې ربعې غیرمالیاتي عوایدو راپور تایید کړی او ټولو وزارتونو او خپلواکو ادارو ته یې سپارښتنه کړې چې د پراختیایي بودجې د لګښت په اړه د دغه راپور وړاندیزونه په پام کې ونیسي.

ټاکل شوې د برېکس سرمشریزې په پای کې د روسیې ولسمشر د ملګرو ملتونو له عمومي سرمنشي سره په منځني ختیځ کې د کړکېچ، د اوکراین وضعیت او ځینو نړۍوالو موضوعاتو په اړه خبرې وکړي.

د برېکس سرمشریزه د«عادلانه نړیوالې پرمختیا او امنیت لپاره د هېوادونو ترمنځ همغږي لا پیاوړي کول» تر عنوان لاندې د روسیې په کازان ښار کې پیلیږي.