احمد صهیب حسرت

د افغانستان د کډوالو او بېرته راستنېدونکو چارو وزارت وایي چې افغان او پاکستاني سرحدي استازو پر تورخم دروازه تګ‌راتګ کې د ستونزو د هواري په موخه ګډه ناسته کړې ده.

افغانستان لپاره د ایران ځانګړي استازي د ریاست الوزراء سیاسي مرستیال سره په لېدنه کې ویلي، هېواد یې په افغانستان کې د نېمګړو روغتیايي پروژو بشپړېدو ته چمتو دی او دغه راز به په پوهنتونونو کې رغنیزې او علمي پروژې پیل کړي.

په کابل کې د ترکیې سفیر د ټرانسپورټ او هوایي چلند سرپرست وزیر په لېدنه کې ویلي، هڅه کوي کوي ترڅو د افغانستان او ترکیې ترمنځ د ځمکني ټرانسپورټ فعاليت لپاره زمينه مساعده کړي.

د ریاست‌الوزراء اقتصادي مرستیال د هند او بنګله‌دېش هېوادونو له یو شمېر علماوو سره په ليدنه کې ویلي، د افغانستان د ملي شتمنۍ کنګل کېدل او بندیزونه هغه ستونزې دي چې د هېواد اقتصادي وده یې ټکنۍ کړې ده.

کورنیو چارو وزارت وایي، په هرات ولایت کې یې د غلو د یوې مسلکي ډلې هغه درې غړي نیولي چې یو ۱۷ کلن ځوان یې له تښتولو وروسته وژلی و.

د ټولګټو وزارت وایي، د دغه وزارت د اوسپنیزې کرښې مرستیال د ایران اوسپنې پټلۍ ادارې له اجرائیوی رئیس سره د دواړو هېوادونو ترمنځ د ریلي همکاریو پر دوام او پراختیا خبرې کړې دي.

د افغانستان د زندانونو چارو د سمون ادارې مشر له ایرانه راغلي پلاوي سره په لیدنه کې ویلي، دې ادارې نړۍوالو څارونکو بنسټونو او رسنیو ته د زندانیانو لیدونو لپاره زمینه مساعده کړې او هیله لري څو په ایران کې د افغان زندانیانو له وضعیت څخه ډاډ ترلاسه کړي.

د ریاست‌الوزراء اقتصادي معاونیت وایي، یو شمېر روسي پانګوالو د ریاست‌الوزراء له اقتصادي مرستیال سره لیدنه کې په افغانستان کې د صنعت، ترانسپورټ، رېل پټلۍ، روغتیا او کرنې برخو کې پانګونې ته لېوالتیا ښودلې ده.

د اسلامي امارت مرستیال ویاند، په افغانستان کې د ثبات د ټینګېدو لپاره د ترکیې او قطر له دریځ‎ هرکلی کړی او ویلي یې دي چې د افغانستان ثبات د ټولو هېوادونو په ګټه دی او ا.ا د خلکو امنیت، اقتصاد او هوساینې لپاره هلې ځلې کوي.

د مخابراتو او معلوماتي ټکنالوجۍ وزارت وایي، د ملي ادارې سره یې کانکور د ازموینې سیسټم د جوړولو هوکړه‌لېک لاسلېک کړی او دغه سیسټم د نمرو ورکونې، پوهنځیو ته محصیلینو د ویش تفکیک او د نمراتو د ترتیب او تنظیم چارې سرته رسوي.

د کانونو او پټرولیم وزارت وایي، هالنډي پانګه‌والو د دغه وزارت له سرپرست سره په لیدنه کې په افغانستان کې د نفت او ګازو د اکتشاف او استخراج، له هغو څخه د انرژۍ تولید او د نفتو د پروسس معیاري کارخونې جوړولو برخه کې پانګه‌ونې ته لېوالتیا ښودلې ده.

ځیني هغه کسان چې مور یا پلار یې د شکر پر ناروغۍ اخته دي، اندېښنه لري چې دوی هم هرو مرو پر دې ناروغۍ اخته کېږي، خو د روغتیایي چارو متخصصین وایي، ټول دا ډول کسان پر شکر نه اخته کېږي او ځیني غیرارثي عوامل هم د دې ناروغۍ لامل کېدای شي.