احمدشاه عرفانیار

تېره اونۍ، ځینو نړۍوالو بنسټونو په افغانستان کې د ښځو د حقونو په اړه اندېښنه څرګنده کړه خو اسلامي امارت دا ادعاوې ناسمې وبللې، د یوناما مشرې ویلي، دا په اسلامي امارت پورې اړه لري چې له نړۍوالې ټولنې سره د تعامل پر لور ګامونه اخلي که نه؟ خو کابل ټینګار کړی چې له نړۍوالې ټولنې سره د تعامل په برخه کې یې خپل مسوولیت ادا کړی دی.

د افغانستان د کډوالو او راستنېدونکو چارو وزارت وايي، تېره ورځ ۲۱ نور افغانان د پاکستان له زندانونو خوشي او هېواد ته راستانه شوي دي.

د ټولګټو وزارت وایي چې تېره اونۍ د افغانستان د څلورو بندرونو د اوسپنې پټلیو له لارې ۸۵ زره او ۷۱۸ مټریک ټنه انتقالات شوي دي.

تېره اونۍ، تورخم کې نښتو مرګ‌ژوبله واړوله او هلته د پژواک د خبریال په ګډون دوه افغان خبریالان هم ټپیان شول او اوچا، جاپان او ډنمارک له افغانستان سره د مرستې لپاره څه باندې ۶۲ میليون ډالر ځانګړي کړل.

په مشهد کې د افغانستان سرقنسول د ایران د خراسان رضوي ولایت له والي سره لیدلي او دواړو لورو د سیاسي، اقتصادي، سوداګریزو او فرهنګي اړیکو پر پیاوړتیا ټینګار کړی دی.

د امريکا ولسمشر ډونالډ ټرمپ د دغه هېواد د استازو جرګې او سنا مجلس غړو ته د وینا پر مهال ویلي، په ۲۰۲۱ کال کې د کابل هوايي ډګر د خونړي بريد اصلي مسوول نیول شوی دی.

د راپورونو له مخې، اسرائیلو تر هغې وروسته، غزې ته د مرستو بار لاریو مخه نیولې چې دویم پړاو اوربند له ستونزو سره مخ شوی دی.

کابل کې د یوه څېړنیز سمینار ګډونوالو وویل چې بهرمېشتي افغان پانګه‌وال دې په هېواد کې پانګونې ته وهڅول شي، د پانګه‌والو د لا خوندیتوب لپاره دې تدایبر ونیول شي، پر افغانۍ د باور کچې لوړولو ته دې کار وشي، کرنه دې میکانیزه او د عشر او زکات لپاره دې تګلاره جوړه شي.

تېره اونۍ، ا.ا وویل چې د نړۍوالې جنايي محکمې په نامه جوړښت ته ځان مکلف نه بولي، اوای‌سي له افغانستان سره پر واقعیتونو ولاړ تعامل ټینګار وکړ، پاکستان اعلان وکړ چې له اسلام‌اباد او راولپندۍ څخه افغان کډوال وباسي او د ۱۷ هېوادونو ښځينه بهرنیو چارو وزیرانو په افغانستان کې پر ښځو «لګول شوي محدودیتونه» اندېښمنوونکي وبلل.

د زندانونو چارو د سمون ادارې سرپرست د اسلامي همکاریو سازمان له استازي او د اندونیزیا له سفیر سره په لیدنه کې د زندانیانو د ښې تغذیې، ښځینه بندیانو ته د روغتیايي خدماتو وړاندې کولو او د دغې ادارې کارکوونکو ته د روزنیروو ورکشاپونو جوړولو برخو کې د همکاريو غوښتنه وکړه.

د راپورونو له مخې، د امریکا متحده ایالاتو پرون د افغانانو په کډون یوه ډله کډوال کاسټاریکا هېواد ته استولي دي.

د افغانستان بانک سرپرست روسیه کې د سایبري امنیت نړۍوال کنفرانس کې ویلي، دغه بانک د سایبري امنیت په برخه کې نړۍوال معیارونه تعقیبوي او هڅه کوي چې د عصري ټکنالوژیو په کارولو سره د هېواد د مالي سکټور امنیت لا خوندي کړي.