سهراب سروري

د ارشاد، حج او اوقافو وزارت مسوولین وايي، د هغو حاجیانو د پاتې پیسو ورکولو لړۍ چې په ۱۴۰۴ کال کې د حج فریضې ادا کولو لپاره سعودي عربستان ته تللي وو، سبا (چهارشنبه) پیلېږي.

لوګر ولایت کې د خصوصي سکټور له لوري د نږدې ۳۷ میلیون ډالرو په پانګونه د ۴۰ میګاواټه په ظرفیت د لمریزې برېښنا د تولید یوې دستګاه او د ۱۲۶ میګاولټ امپیر په ظرفیت د یوه سب‌سټېشن جوړولو چارې پیل شوې.

د برېښنا شرکت اجرائیوي رییس وايي، د افغانستان ۸۰ سلنه برېښنا له بهرنیو سرچینو برابرېږي او اوسمهال د هېواد ۴۰ سلنه نفوس برېښنا ته لاسرسی لري او تر راتلونکو دوو کلونو به په دغه شمېر کې د پام وړ لوړوالی راشي.

د افغانستان لپاره د چین ځانګړي استازي ویلي چې د بهرنیو چارو وزارت له سرپرست امیرخان متقي سره یې د افغانستان د بیارغونې لپاره له ګاونډیو هېوادونو او نړۍوالې ټولنې سره د همکاریو د لارو چارو په اړه خبرې کړې دي.

د راپورونو له مخې، د اندونیزیا په شمالي سولاوسي جزیره کې په یوه کښتۍ کې د اورلګېدنې له امله پنځو کسانو ژوند له لاسه ورکړی دی.

د اسلامي امارت مرستیال ویاند په برېتانیا کې د اطلاعاتو افشا کېدو غبرګون کې وایي، د بښنې عمومي فرمان ټولو ته خوندیتوب ورکوي او تر اوسه هيڅوک د خپلو تېرو کړنو له امله نیول شوی یا وژل شوی نه دی او نه تر تعقیب لاندې دی.

په افغانستان کې د ملګرو ملتونو د بشري مېشتېدنې پروګرام (یواېن – هبیتات) په کابل کې د اوبو د کمښت ناورین په اړه د اندېښنې څرګندولو ترڅنګ ويلي چې دې ستونزې ته رسېدنه پراخې پانګونې، هراړخیزې همکارۍ او د عامه پوهاوي لوړېدو  ته اړتیا لري.

د خوړو نړۍوال پروګرام(WFP)  له ایرانه د راستنېدونکو کډوالو د وضعیت په اړه د اندېښنې په څرګندولو سره ویلي چې د سرچینو د محدودیت له امله یوازې یو شمېر اړمنو کسانو ته بشري مرستې رسولای شي.

کابل کې یوه خصوصي پوهنتون په هېواد کې د خبریالانو د مالي او تحصیلي ملاتړ لپاره صندوق جوړ کړی دی.

د کورنیو چارو وزارت له نشه‌يي توکو سره د مبارزې معین د ملګرو ملتونو له نشه‌يي توکو او جرمونو سره د مبارزې دفتر عملیاتي برخې له رییس سره په لیدنه کې د بدیل کښت او روږدو درملنې برخو کې د دغه بنسټ د ملاتړ ډېرېدو غوښتنه کړې ده.

د محرم لسمه (عاشورا) په کابل ښار کې د حکومتي مسوولینو، قومي مشرانو او ځوانانو په ګډون د یو لړ مراسمو په ترڅ کې ولمانځل شوه؛ ګډونوالو دغه ورځ د سرښندنې، عدالت غوښتنې او یووالي ورځ وبلله او د مسلمانانو ترمنځ یې پر ورورولۍ او اتحاد ټینګار وکړ.

د پاکستان حکومت امر کړی چې د افغان کډوالو د پي‌او‌ار کارتونو د تمدید په اړه دې تر وروستۍ پرېکړې د دغو کارت‌لرونکو پر وړاندې هیڅ ډول اقدام نه کېږي.