نورالله ځاځى

د ریاست‌الوزرا سیاسي مرستیال  په افغانستان کې د سره صلیب او سرې میاشتې هڅې ستايي او وايي چې د افغانستان او فلسطین په ګډون په ګڼو اسلامي هېوادونو کې د سرې میاشتې او سره صلیب فعالیتونو ته په میلونونو خلک اړتیا لري.

قزاقستان د لومړي وزیر مرستیال د ریاست‌الوزراء له اقتصادي مرستیال سره په لیدنه کې د افغانستان په مختلفو برخو کې د کار کولو ژمنه کړې او ویلي چې له افغانستان سره د سوداګرۍ زیاتولو لپاره یوه ګډه‌خونه رامنځته کوي.

د مالیزیا هېواد یو پلاوی چې بېلابېلو برخو کې د همکارۍ او اړیکو پراخېدو په موخه کابل ته راغلی، د ریاست‌الوزرا له سیاسي مرستیال سره په لیدنه کې یې ویلي، دوی به له نړۍ سره د اسلامي امارت تعامل لپاره‎ هڅه وکړي.

د ریاست‌الوزرا سیاسي مرستیال د افغانستان لپاره د روسیې ولسمشر له ځانګړي استازي سره په لیدنه کې ویلي، د کابل او مسکو ګډې هڅې کولای شي په سیمه کې د ګواښونو مخه ونیسي او هیله یې څرګند کړې څو په مسکو فارمټ کې افغانستان ته رسمي غړیتوب ورکړل شي.

د بهرنیو چارو وزارت سرپرست په کابل کې د چین له سفیر سره په لیدنه کې ویلي، سیمه کې وروستۍ پېښې او پرمختګونه ایجابوي چې دواړه هېوادونه خپلو همکاریو ته په بشپړه همغږۍ دوام ورکړي.

علماوو کابل کې د امام ترمذي (رح) له دارالعلوم څخه د ۴۵ کسانو په فراغت‌غونډه کې د علم پر اهمیت خبرې وکړې، ویې ویل چې علم د اسلامي نظام لپاره «موقوف‌علیه» دی او د علم له لارې به افغانستان اباد شي.

طبیعي پېښو ته د رسېدو په چارو کې د دولت وزارت وایي، د وروستیو ورښتونو او سېلابونو راوتلو له امله په ټول افغانستان کې ۷۰ تنه مړه، ۵۶ نور ټپیان او څه باندې ۲۶۰۰ کورونه په نیمه او بشپړ ډول ویجاړ شوي دي.

د کابل ښاروالۍ وايي چې د ښار شپاړلسمې ناحیې په ۲۳م او ۲۴م ګذر کې د ۱۷ میلیون افغانیو په لګښت د کوڅو جوړولو چارې بشپړې شوې.

د افغانستان بانک اعلان کړی چې د راتلونکې اونۍ پر شنبې ورځ  ۱۵ میلیون امریکایي ډالر د داوطلبۍ له لارې لیلاموي.

د ریاست‌الوزراء اقتصادي معاونیت وایي، د ملي تدارکاتو کمېسیون له لوري د شاوخوا یوولس میلیارد افغانیو په ارزښت ۲۴ بېلابېلې پروژې منظورې شوې چې په پلې کېدو به یې سلګونه کسانو ته د کار زمینه برابره شي.

د افغانستان بانک د تېر لمریز کال په اوږدو کې د افغانۍ ارزښت او ثبات ساتلو په موخه په ۴۰ ځلونو کې ۵۹۴ میلیون امریکایي ډالر د داوطلبۍ له لارې لیلام کړي دي.

د سعودي عربستان د ملک سلمان خیریه بنسټ له افغاني سرې میاشتې ټولنې سره د ۱۵ میلیونه افغانیو په ارزښت د ۱۰۰ ټنه خُرما مرسته وکړه.