په پکتیکا کې یو ځانمرګی بريدګر نیول شوی

کابل (پژواک، د غويي لومړۍ نېټه ٩٦) : چارواکي وايي چې په پکتيکا ولايت يو ځانمرګى بريد کوونکى نيول شوى دى.

د پکتیکا د والي وياند محمد الرحمن اياز د غويي په لومړۍ نېټه پژواک اژانس ته وويل چې تېره ورځ ددغه ولايت په یوسف خېلو ولسوالۍ کې یو تن ځانمرګی برید کوونکی موخې ته تر رسېدو وړاندې نیول شوی دی.

هغه وايي، یاد ځانمرګی بریدګر مخکې له دې چې ملکي خلک قرباني کړي د پکتیکا د ملي امنیت ځواکونو له لوري ونیول شو.

د اياز په خبره، دغه ځانمرګى بريدکوونکى ګلا خان نوميږي او له چاودېدونکو توکو ډک واسکټ يې هم اغوستى و.      

د سرچينې په وينا، له دغه ځانمرګي څخه د امنيتي ځواکونو پوښتنې روانې دي.

وسله والو طالبانو تراوسه پورې په دې اړه څه نه دي ويلي .