غزنيښار (پژواک، ۱۴ لېندۍ ۱۴۰۴): د غزني د بدني روزنې او ورزش امریت وایي چې د دغه ولایت د څلورو ولسوالیو د ۲۸ لوبډلو ترمنځ د نیزهوهنې سیالۍ د اندړو ولسوالۍ د «فتح محمد شلګروال» لوبډلې په بریا پای ته ورسېدې.
د غزني ولایت د بدني روزنې او ورزش امر بلال مجاهد پژواک خبري آژانس ته وویل چې یادې سیالۍ د نیزهوهنې فدراسیون له لوري، د بدني روزنې او ورزش امریت په همغږۍ، په ۱۶ سکشنونو کې د ګیرو، اندړو، قرهباغ او دهیک ولسوالیو ترمنځ د اندړو ولسوالۍ د محکوم کلي په ورزشي ډګر کې ترسره شوې.
هغه زیاته کړه چې د سیالیو په پای کې د اندړو ولسوالۍ د فتحمحمد شلګروال لوبډلې لومړی مقام او د ګیرو ولسوالۍ د روزيمحمد لوبډلې دویم مقام وګاټه.
ده وویل، یادې سیالۍ د دودیزو ورزشي لوبو د پیاوړتیا، د خلکو ترمنځ د یووالي او د همغږۍ او فرهنګي اړیکو د پراختیا په موخه ترسره شوې.
د هغه په وینا، دا ډول دودیزې سیالۍ نه یوازې فرهنګي ارزښت لري، بلکې د ځوانانو د استعداد د ودې، سیمهییزو سپورتي فعالیتونو او ورورولۍ د ټینګښت لپاره هم مهم رول لري.
په همدې حال کې، د نیزهوهنې ځینې لوبغاړي په غزني کې د اسانتیاوو غوښتنه کوي. یو تن لوبغاړي محمدنور پژواک ته وویل: «نیزهوهنه په غزني کې یوه پخوانۍ او لرغونې لوبه ده.»
هغه زیاته کړه: «حکومت دې د نیزهبازانو لپاره امکانات برابر کړي او د دوی د آسونو د ساتنې او روزنې لپاره هم لازمې اسانتیاوې په پام کې ونیسي.»
GET IN TOUCH
NEWSLETTER
SUGGEST A STORY
PAJHWOK MOBILE APP