کابل ( پژواک ٣ ليندۍ ٩٠): د افغانستان د کاراټې ملي لوبډلې د اوو مډالونو په ترلاسه کولو سره د سارک د غړيو هېوادونو په سياليو کې درېيم ځاى ترلاسه کړ.
دغه سيالۍ درې ورځې مخکې د سارک د اتو غړيو هېوادونو (هندوستان، افغانستان، پاکستان، سریلانکا، نیپال،مالدیف، بوتان او بنګلدېش) په ګډون د هند په پلازمېنه نوي ډهلي کې پيل او تېره شپه پاى ته ورسېدې.
د اولمپيک د ملي کمېټې وياند مجيب الله رحماني نن ( د ليندۍ په درېيمه) پژواک خبري اژانس ته وويل، چې په دغو سياليو کې افغانستان درې د سرو زرو، يو د سپينو زرو او درې د برونزو مډالونه ترلاسه کړل.
د نوموړي په وينا، د هېواد د کاراټې ملي لوبډلې د اتو لوبغاړو په ګډون په دغو سياليو کې برخه اخيستې وه.
رحماني زياته کړه، چې په سياليو کې د افغانستان له لوري يواځنۍ ښځينه لوبغاړې مينا اسدي د برونزو مډال ترلاسه کړ.
نوموړي وويل، چې د سياليو په پاى کې افغانستان د پاکستان او هندوستان له لوبډلو وروسته درېيم ځاى ترلاسه کړ.
په دغو سياليو کې د هېواد د ښځينه لوبغاړو استازې مينا اسدي مخکې له سياليو پژواک ته ويلي و : (( زياته خوشحاله يم، چې د لومړي ځل لپاره په اسيايي لوبو کې د يوې افغانې نجلۍ په توګه ميدان ته ځم او د ګران هېواد تر بيرغ لاندې سيالۍ کوم. ))
