کابل (پژواک٢٨زمرى٩٢): د المپيک د کمېټې چارواکي وايي چې، په کابل کې به په تېرو لسو کلونو کې د لومړي ځل لپاره سبا د افغانستان او ګاونډي هېواد پاکستان د فوټبال لوبډلو ترمنځ نړيواله سيالي ترسره شي.
نن د پاکستاني فوټبال لوبدلې لوبغاړي پس له غرمې له اسلام اباد څخه کابل ته راورسېدل.
د دواړو هېوادونو د فوټبال لوبډلو مشرانو او روزونکو نن په کابل کې په يوه خبري ناسته کې وويل چې د سبا ورځې سيالي به سمبوليکه بڼه ولري او دواړو هېوادونو ترمنځ په دوستانه ډول به ترسره شي.
د پاکستاني لوبډلې کپتان ثمر اسحق وويل چې لوبغاړو يې ددې لوبې لپاره يې وار له مخه پوره تياري نيولې ده.
اسحق ډاډ څرګند کړ چې د سبا ورځې سيالي به د پاکستان په ګټه پاى ته ورسوي.
د دواړو هېوادونو د فوټبال لوبډلو پوره ٣٧ کاله مخکې نړيواله سيالي کړې وه.
د پاکستاني لوبډلې روزونکي زويسا ميلوسويچ وويل چې لوبغاړي يې د کم عمر لرونکي دي، خو ددې سيالي لپاره يې پوره چمتووالى نيولى دى.
ميلوسوېچ وويل چې دوى به ددې لوبې د ګټلو لپاره خپلې ټولې هڅې وکړي.
هغه د امنيتي وضعيت په اړه د يوې پوښتنې په ځواب کې وويل چې دلته په کابل کې ځان په بشپړه توګه راحت بولي.
ده همداراز د افغانستان له فوټبال فدراسيون څخه يې د مېلمه پالنې له امله مننه وکړه.
د افغانستان د فوټبال فدراسيون مرستيال مشر محمد يوسف کارګر د دواړو هېوادونو ترمنځ د سبا ورځې سيالي دوستانه وبلله او ويې ويل چې د لوبې ګټل او بايلل مهم نه دي.
ده وويل چې دا ډول دوستانه لوبې کولى شي له يوې خوا د لوبغاړو وړتياوې لوړې کړي او له بلې خوا د دواړو هېوادونو خلک يو له بل سره نږدې کړي.
کارګر وويل چې که څه هم په تېرو لسو کلونو د نورو هېوادونو په پرتله افغان لوبغاړو ډېرې کمې اسانتياوې لرلې، خو خپلې وړتياوې يې ډېرې لوړې کړي دي.
د افغانستان د فوټبال فدراسيون يوه چارواکي على رضا اقازاده، وويل چې څلور تاجکستاني داوران به ددې سيالي داوري وکړي.
اقازاده وويل چې په تېرو لسو کلونو کې د لومړي ځل لپاره د نړيوالو سياليو کوربه توب د افغانستان لپاره د ډېر اهميت لرونکې دى.
