کابل (پژواک ٣ ليندۍ ٩٣): په کابل ښار کې د څه باندې ۱۸ ميليونو افغانيو په لګښت د يوه ښوونځي د جوړېدو د بنسټ ډبره کېښودل شوه، چې لګښت يې په افغانستان کې د امريکا پخوانى سفير زلمى خليلزاد ورکوي.
نن په دې اړه جوړو شويو مراسمو کې د پوهنې سرپرست وزير فاروق وردګ وويل، چې د دغه ښوونځي نوې ودانۍ په پنځمه ناحيه کې جوړيږي، چې ۲۰ درسي او اداري خونې او نورې لازمې ښوونيزې اسانتياوې به ولري.
ده زياته کړه، د ښوونځي د نوې ودانۍ جوړېدل شاوخوا يو کال وخت اخلي، چې په بشپړېدو سره به يې نږدې ۱۶۰۰ زده کوونکو ته د زده کړې خوندي تدريسي چاپېريال برابر شي.
د هغه په وينا، پردې ښوونځي ۱۸،۸ ميليونه افغانۍ لګښت راځي، چې په افغانستان کې د امريکا د پخواني سفير زلمي خليلزاد له خوا ورکول کېږي او دا په کابل ښار کې د ښوونځيو د جوړېدو يوه لويه ساختماني پروژه ده.
په دې غونډه کې خليلزاد وويل، د افغانستان پرمختګ او ټيکاو په مسلکي او پرمختللي ښوونيز نظام پورې تړلی دی.
د پوهنې وزارت د معلوماتو له مخې، اوسمهال د کابل ښار اړوند په ۶۱۷ ښوونيزو موسسو کې، چې ۳۱۹ هغه يې خصوصي دي، څه باندې يو ميليون او ۴۶زره زده کوونکي پر زده کړو بوخت دي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن