د کابل-جلال اباد پر لويه لار ترافيکي پېښې مرګ ژوبله واړوله

کابل (پژواک ، ١١وږى ٩٦): د کابل - جلال اباد پر لويه لاره د ترافيکي پېښې له امله يوتن مړ او دوه تنه نور سخت ټپيان  شوي دي.  

د لغمان د والي وياند سرحدي ځواک پژواک اژانس ته وويل چې دغه پېښه نن له غرمې وروسته يوه نيمه بجه د کابل –جلال اباد پرلويه لاره د لغمان ولايت اړوند د سرخکانو په سيمه رامنځته شوې .

هغه وويل، پېښه هغه مهال رامنځته شوه چې يو کروزين له يوه ټوډي موټر سره وجنګېد.

د نوموړي په خبره، چې په ټوډي موټر کې ناست يوتن مړ شوى او دوه نور ټپيان دي، د کروزين موټر چلوونکى د پېښې له ځايه تښتېدلى او موټر  يې پرې ايښى دى .

د هغه په وينا، چې د پېښې ځاى ته پوليس او ترافيک رسېدلي او څېړنې يې پيل کړې دي .

د کابل – جلال اباد لويه لار  زياتره وخت د ترافيکي پېښو شاهده وي، چې د موټرو ګړندى تګ، د ترافيکي قوانينو نه مراعات او د لارې خرابوالى د دغو پېښو عمده لاملونه ياديږي.