کابل (پژواک،۲۷وری۹۷): د افغانستان د سوداګرۍ او صنايعو خونه وايي چې پاکستان دغه هېواد ته د افغانستان صادراتي سبو او مېوو د صحي تصديق پاڼې غوښتلو په پلمې سره، د افغانستان د صادراتو مخه نيسي او که دې کار ته دوام ورکړي، افغانستان بايد بالمثل اقدام وکړي.
دغه خونه خبرداری ورکوي چې که د روان کال د غويي مياشتې تر پايه پاکستان ته د افغانستان د صادراتي سبو او مېوو د صحي تصديق پاڼې ستونزه حل نه شي، افغان سوداګر او بزګران به له سترې ستونزې سره مخامخ شي.
د افغانستان د سوداګرۍ او صنايعو خونې لومړي مرستيال خانجان الکوزي، نن په کابل کې له يو شمېر سوداګرو سره په ګډه خبري ناسته کې وويل چې کابو له پنځو مياشتو را په دې خوا پاکستان د افغانستان پر هغو زراعتي محصولاتو چې دغه هېواد ته صادرېږي، ځينې شرطونه وضع کړي دي.
نوموړي زياته کړه چې له پنځو مياشتو راهيسې، پاکستان خپلې خاورې ته د افغانستان د هغو مېوو او سبو د داخلېدو اجازه نه ورکوي چې باوري صحي سرټيفيکيټ (تصديق نامه) ونه لري چې په کې د کرنيزې ځمکې د خاورې نوعيت او نور مهم موارد شرحه کېږي.
هغه د پاکستان د دې پرېکړې له امله د اندېښنې په څرګندولو سره وويل: “د افغانستان د کرنې او مالدارۍ وزارت د دې وړتيا نه لري چې دا ډول د لوړکيفيت لرونکی سرټيفيکيټ دې جوړ او د مېوو او سبو صادروونکو ته دې ورکړي.”
نوموړي وويل چې که پاکستان د غويي مياشتې تر پاي پورې له خپلې پرېکړې څخه تېر نه شي، د مېوو او سبو په رسېدو سره به افغان سوداګر او بزګران له جدي ستونزو سره مخامخ شي.
هغه وويل: “پاکستان هڅه کوي چې په بېلا بېلو نومونو سره، د افغاني محصولاتو د صادراتو مخه ونيول شي او په دې توګه زموږ د هېواد خلکو او اقتصاد ته دروند زيان ورسوي.”
هغه زياته کړه چې افغانستان په ۱۳۹۶ کال کې ۱.۲ميليون ټنه زراعتي محصولات درلودل چې له ۸۰۰زره ټنه ډېر يې پاکستان ته صادر شوي دي.
د نوموړي په خبره، اوسمهال د تصديق پاڼې نه لرلو له امله نږدې د پاکستان د حکومت له خوا په تورخم کې د افغانستان ۳۰۰۰ټنه پنبه درول شوې ده.
الکوزي، پاکستان د افغانستان ستر سوداګريز شريک وباله او زياته يې کړه: “موږ پردې باور يو چې که افغان حکومت د پاکستان له حکومت سره دغه ستونزه حل نه کړي، زموږ سوداګر او بڼ وال به له ستو ستونزو سره مخ شي او زيان به وکړي.”
هغه وويل چې د پاکستان د حکومت له خوا دغه پرېکړه په داسې حال کې شوې چې پاکستاني توکي په جعلي سرټيفيکيټونو افغانستان ته واردېږي.
د مېوو او سبو صادروونکو ټولنې مشر حاجي اخترمحمد احمدزي په نننۍ ناسته کې له حکومت څخه وغوښتل چې ژر تر ژره دې په دې اړه اقدام وکړي او د حکومت، سوداګرۍ او صنايعو خونې له استازو څخه جوړ يو پلاوی دې پاکستان ته ولاړ شي او د دغه هېواد له حکومت سره دې د ستونزې د حل په موخه جدي خبرې وکړي.
د هغه په وينا، که د پاکستان حکومت دغه ستونزه حل نه کړي، بايد افغان حکومت بالمثل عمل وکړي او اجازه دې نه ورکوي چې پاکستاني صادرات افغانستان ته را داخل شي.
يادو شويو کسانو وويل چې که دغه ستونزه حل نه شي، افغان سوداګر به بديلې لارې پيدا کړي او له پاکستان سره به خپله سوداګري بنده کړي.
د کرنې، مالدارۍ او اوبو لګولو وزارت وياند اکبر رستمي پژواک خبري اژانس ته وويل چې اوسمهال د کرنيزو محصولاتو لپاره د ياد شوي وزارت له خوا يوه تصديق پاڼه ورکول کېږي چې د ټولو اسيايي، عربي او اروپايي هېوادونو د تاييد وړ ده او له پاکستان پرته هېڅوک ستونزه نه جوړوي.
نوموړي وويل: “پاکستان پر داسې معيارونو برابر سرټيفيکيټ غواړي چې خپله هم دا ډول سرټيفيکيټ نه لري.”
نوموړي وويل چې د کرنې وزارت له سوداګرۍ او صنايعو وزارت سره په ګډه کار کوي څو دغه ستونزه له ډيپلوماټيکو لارو چارو حل کړي.
د سوداګرۍ او صنايعو وزارت وياند مسافر قوقندي په دې اړه وويل چې ډېر ژر د پاکستان په پلازمېنه اسلام اباد کې د افغانستان او پاکستان ترمنځ دوه اړخيزه ناسته جوړېږي او افغان لوری به له پاکستاني چارواکو سره دغه ستونزه په جدي توګه مطرح کړي.
نوموړي هم وويل که دغه ستونزه حل نه شي، افغانستان به د سوداګرۍ لپاره بديلې لارې پيدا کړي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن