د ولسي جرګې یو پخوانی غړی له طالبانو سره یو ځای شوی

کابل(پژواک، ٢٢ تله ٩٩):د بامیان ولایت سیمه ییز چارواکي وايي چې د ولسي جرګې په ۱۶مه دوره کېد دغه ولایت پخوانی استازی عبدالرحمن شهیداني له طالبانو سره یوځای شوی دی.

د یوه مکتوب د کاپي پر اساس چې پژواک خبري اژانس ته رسېدلې؛ د بامیان والي سید انور رحمتي د روان کال د تلې په شلمه نېټه په لیکلې بڼه د سمیه ییزو ارګانونو خپلواکې ادارې ته خبر ورکړی چې د ولسي جرګې په ۱۶مه دوره کې د بامیان د خلکو استازی عبدالرحمن شهیداني له طالبانو سره یو ځای شوی او قطر ته تللی دی.

د سیمه ییزو ارګانونو ادارې ویاندې نرګس مهمند تایید کړه چې دغه لیک دوی ته رسېدلی او سیمه د ییزو ارګانونو ادارې د موضوع د نورو څېړنو په موخه پاڼه کشفي او امنیتي ارګانونو ته سپارلې ده.

عبدالرحمن شهیداني د بامیان ولایت اوسېدونکی دی او د ملي شورا په ۱۶مه دوره کې په ولسي جرګه کې د دغه ولایت د خلکو استازی او د وحدت ګوند غړی و.

شهیداني له ۱۳۸۱ کال وروسته افغانستان ته راستون شو او د بامیان، غزني او غور د امنیه قوماندان په توګه یې هم دنده ترسره کړې ده.