کابل (پژواک، ٢١ مرغومى ٩٩) : د اندونيزيا يوه ملکي مسافر وړونکې الوتکه چې ٦٢ کسان په کې وو، بحر کې لوېدلې ده.
د اندونيزيا د هوايي چلند ادارې ويلي چې د سرى وجائيا هوايي شرکت اړونده ٧٣٧ بوينګ ډوله الوتکه پرون له پلازمېنې څخه پونتيانک ښار ته روانه وه، چې تر الوتنې څلور د قيقې وروسته ورسره اړيکې پرې او له رادار څخه نادرکه شوه.
سرچينې زياته کړې چې د الوتکې پيلوټ د کومې بېړنۍ پېښې اشاره هم نه ده ورکړې، خو ويل کيږي چې تر الوتنې څو دقيقې وروسته درې زره متره ټيټه شوې او بيا بحر ته غورځېدلې ده.
بحر ته د نږدې سيمې اوسېدونکو رسنيو ته ويلي چې دوى د يوې زورورې چاودنې غږ اورېدلى دى.
په بحر کې يو تن کب نيونکي ويلي، الوتکې بحر ته له غورځېدو سره سم چاودنه وکړه .
بلخوا د اندونيزيا د ترانسپورټ وزارت ويلي چې د ژغورنې ټيم له لسو کښتيو سره سيمې ته رسېدلى او د مړو د را ايستلو هڅې يې پيل کړې دي.
سرچينې زياته کړې چې تر اوسه د الوتکې ځينې ټوټې موندل شوې دي.
د راپورونو له مخې،د الوتکې د ١٢ تنه عملې په ګډون ٦٢ کسان چې اووه ماشومان او يو شمېر ښځې هم په کې شاملې دي، ويل کېږي چې ټول مړه شوي دي.
د يادونې ده چې په ٢٠١٨ کال کې هم په همدې سيمه کې د اندونيزيا يوه الوتکه غورځېدلې وه.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن