مزارشریف (پژواک ۲۸ وری ۱۴۰۰): د بلخ ولایت د بلخ ولسوالۍ په بازار کې د هاوان ۳ مرميو لګېدو له امله ۱۳ ملکیانو ته مرګ ژوبله اوښتې ده.
د بلخ ولسوالۍ ځایي اوسېدونکو پژواک اژانس ته وویل چې دغه پېښه نن درې بجې رامنځته شوې ده.
د پېښې عیني شاهد احمد فیصل وايي چې نن وروسته له غرمې خلک په بازار کې پر کاروبار بوخت و چې د هاوان درې مرمۍ راغلې او د مزار بندر په سیمه کې ولګېدې.
هغه وویل چې د هاوان مرمیو لګېدو نه وروسته یې یو شمېر ښاریان ولیدل چې په ټپي حالت کې پر سړک پراته وو.
نوموړی وایي، د ګاونډ یو هټۍ وال یې دغه پېښه کې وژل شوی دی.
په ورته مهال یوه باوري سرچینه پژواک ته وایي چې په دغه پېښه کې د یوه نهه کلن ماشوم په ګډون ۳ ملکیان وژل شوي او د ماشومانو په ګډون ۱۰ تنه نور ټپیان دي.
سرچینه زياتوي، وژل شوي او ټپیان ټول ملکي وګړي دي.
خو د بلخ ولسوال محمد یونس ستانکزي پژواک ته وویل چې د لومړنیو معلوماتو له مخې په دغه پېښه کې درې ملکیانو خپل ژوند له لاسه ورکړی او ۲ تنه نور ټپیان دي.
د برید مسوولیت تر دې مهاله چا پر غاړه نه دی اخیستی.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن