شبرغان (پژواک، د غويي لومړۍ نېټه ۱۴۰۰): جوزجان کې د افغان ګاز دولتي شرکت د شبرغان ښار لس زره کورنیو ته د کور په کور ګاز رسونې کار د پيل خبر ورکړی او ویلي یې دي چې د دغه شرکت سږني عواید به له اووه سوه میلیونه، څه باندې ۱،۱ میلیارد افغانیو ته لوړ شي.
دا په داسې حال کې ده چې پنځلس کاله مخکې د شبرغان ښاریانو له ګاز څخه ګټه پورته کوله، خو له دې امله چې ګاز په غیر معیاري او بې کیفیته نلونو کې وېشل کېده، هغو ټولو د باران له امله زنګ ووهل او له منځه ولاړل او دغه کار د ګاز پرې کېدو لامل شو.
د افغان ګاز شرکت رییس انجنیز عبدالقیوم پژواک ته په مرکه کې وویل چې د شبرغان ښار لس زره کورونو ته د کور په کور ګاز رسونې پروسه د نل غځونې او مېترونو په لګولو سره پیل شوه چې تر درېیو میاشتو پورې به بشپړه شي.
نوموړي زیاته کړه: ((د دې کار په بشپړېدو سره به زموږ عواید له پېشبیني شوي پلان مخکې تر ۱،۱ میلیارد افغانیو ډېر شي، په داسې حال کې چې په ۱۳۹۹ مالي کال کې زموږ عواید اووه سوه میلیون افغانیو ته رسېږي.))
هغه زیاته کړه چې دغه شرکت اوسمهال له ۳۲ څاګانو یوازې له څلورو یې چې د باشیکورد، جرقدوق، شکرک او خواجه ګوګردک ګاز څاګانې دي، د خپلو مستهلکینو اړتیا پوره کوي.
د قیوم د معلوماتو له مخې، پرېکړه دا ده چې په روان کال کې د سلفر تجریدولو نوې دستګاه د اوسنۍ دستګاه ترڅنګ فعاله شي چې په لګولو سره به یې په ۲۴ ساعتونو د ګاز پروسس دوه میلیون متر مکعب ته ورسېږي.
ده زیاته کړه: ((اوسمهال موږ د سلفر تجریدولو دستګاه په وسیله (له طبیعي ګازه د مضره مواد بېلول) شپږ سوه زره متر مکعب ګاز د مزارشریف د کود او برق فابریکې لګښت او د بیات ګازي ټوربینونو پاور پروسس لپاره چمتو کوي.))
د سرچینې په خبره، دغه راز د دغه کال په اوږدو کې ګیلاس او غضنفر ګروپ تولیدي شرکتونو خپل تولیدي فعالیتونه د برېښنا انرژۍ تامین او د ګیلاسونو چمتو کولو برخو کې پیل کړي چې د دې ادارې عوایدو لوړېدو کې به ډېر رول ولري.
د شبرغان ښار اوسېدونکي د ګاز رسونې د پروژې کار ستایي او هيله لري چې دغه پروژه په کامیابۍ سره سرته ورسیږي او دا ځل له با کیفیته وسایلو څخه ګټه واخیستل شي ترڅو دغه ولایت ته ګازرسونه قطع نه شي.
د جوزجان سوداګرۍ خونې ريیس حاجي یولبرس عطايي د دغه پروګرام پر پیلېدو خوښي وښوده او ویې ویل: ((د طبیعي ګازو سرشارې سرچینې لرو، خو له هغو ګټه نه شو اخیستی؛ ځکه په تېره دوره کې له بې کیفیته نلونو کار اخیستل شوی و چې ټول زنګ ووهل او سوري شوي وو او بالاخره ګازلېږدونه ودرېده.))
عطايي وویل چې اوس د شبرغان ګاز مزارشریف ته لېږدول کېږي خو د دغه ولایت اوسېدونکي د ازبکستان او ترکمنستان له وارداتي ګاز نه استفاده کوي.
د شبرغان ښار یوه اوسېدونکي روح الله غفوري د شبرغان ښاریانو ته د ګاز رسونې د دې پروژې هرکلی وکړ او وایي چې دغه کار به د دغه ښار اوسېدونکو ته اسانتیاوې برابرې کړي.
ده زیاته کړه، اوس چې خلک له کوم ګاز څځه ګټه اخلي، هغه له ازبکستان او ترکمنستان څخه واردېږي، معياري نه دی، موږ په ځینو مواردو کې شاهد یو چې له دغه ګازه ګټه د خلکو روغتیا په خطر کې اچولې؛ ځکه معلومه نه ده چې څه ډول مواد ترکیب کې لري.
په شبرغان کې د ګاز ۷۷ غیر فعالې څاګانې شته او اوسمهال د افغان ګاز شرکت کارمندان او انجنیران د خواجه ګوګردک په سیمه کې د پنځو څاګانو پر فعالولو بوخت دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن