فېروزکوه (پژواک، ۲۰ غویی۱۴۰۰): د غور ولایت روغتیايي چارواکي په دغه ولایت کې په شري ناروغۍ د لسګونه ماشومانو د اخته کېدو خبر ورکوي او وايي چې د دغې ناروغۍ څرنګوالي څېړلو لپاره یې روغتیايي ټېمونه ګومارلي دي.
د غور عامې روعتیا رییس جمعه ګل يعقوبي له پژواک سره مرکه کې وويل چې له یوې میاشتې راهیسې، په ماشومانو کې د شري ناروغي ډېره شوې ده.
هغه زیاته کړه چې د ورځې لسګونه ماشومان روغتیایي مرکزونو ته ورځې او د دغې ناروغۍ ډېرښت یې د اندېښنې وړ وباله.
د ده په وینا، ټولیزې شمېرې د تجزیې په حال کې دي او په راتلونکو ورځو کې به له رسنیو سره شریکې شي.
خو نوموړي یادونه وکړه چې پر یادې ناروغۍ ډېر اخته کسان په شهرک، دولینه، مرغاب ولسوالیو او فېروزکوه ښار کې دي.
سرچینې وویل چې له درېیو کلونو راهیسې په دغه ولایت کې د شري واکسین نه دی تطبیق شوی، ښایي د ناروغۍ د ډېرښت یو لامل هم دا وي.
د یعقوبي په وینا، د شري ناروغۍ د زیاتوالي لاملونو څېړلو لپاره ځانګړو ټېمونو کار پیل کړی او یادو ولسوالیو ته ځي څو د ناروغۍ د ډېرښت لاملونه پیدا کړي.
د عامې روغتیا رییس څرګنده کړه چې خپلې اندېښنې یې له اړوند وزارت سره هم شریکې کړې دي.
په ورته مهال، د غور ولایتي روغتون سرپرست ډاکټر نصیر پارسا هم وویل چې دغه ناروغي زیاته شوې او د اندېښنې وړ ده.
نوموړي زیاته کړه: «اوس مهال د دوو کرونا او شري ناروغیو له امله ډېرې ستونزې لرو؛ د بشري سرچینو، درملو او ځای نه شتون ستونزې مو څو ځله له مرکز سره شریکې کړې، دا مهال ۳۵ تر ۴۰ کسان بستر دي.»
هغه زياته کړه چې ډېرى مراجعین یې د شهرک، تولک فېروزکوه، مرغاب او دولتيار ولسوالیو اوسېدونکي دي.
د غور د شهرک ولسوالۍ د روغتون رییس ډاکتر همایون فضل هم وویل چې د ورځې ۱۱ تر ۱۵ په شري ناروغۍ اخته ماشومان ورځي؛ په داسې حال کې چې مخکې به په اوونۍ له دوو دغو ماشونو ډېر نه ورتلل.
هغه زیاته کړه: “شري ناروغي یوازې شهرک کې نه، بلکې د غور په ټولو سیمو کې ډېره شوې ده، دا زموږ لپاره د اندېښنې وړ موضوع ده.”
د غور ولایت په یوه خصوصي روغتون کې د ماشومانو د ناروغیو متخصص ډاکټر موسی الفت هم د شري ناروغۍ زیاتوالی د اندېښنې وړ بولي؛ خو له کورنیو غواړي چې د خپلو ماشومانو روغتیا ته جدي پاملرنه وکړي.
هغه وویل: “د دغه وژونکي ویروس مخنیوي یوازینۍ لار واکسین او د روغتیایي سپارښتنو مراعاتول دي، کورنۍ باید په دې اړه جدي پاملرنه وکړي.»
سرچینې څرګنده کړه چې په دې ناروغۍ اخته ماشومان باید ژر تر ژره روغتیایي مرکز ته ولېږدول شي او له خپل سرې درملنې ډډه وشي.
خو د دغو ماشومانو پایوازان د غور ولایت په روغتیایي مرکزونو کې د درملو او کافي بسترونو له نشتوالي شکایت کوي.
سردار احمدي چې د فېروزکوه له لوېديځ، الله یار کلي یې د غور ولایتي روغتون ته په یاده ناروغۍ اخته دوه ماشومان راوړي وو، وویل چې ټول درمل له شخصي درملتونونو اخلي او په روغتون کې کافي بسترونه نشته.
نوموړي زیاته کړه: «پنځه ورځې کېږي چې دا دوه زامن مې روغتون ته راوړي؛ له بده مرغه نه درمل شته او نه د بستر لپاره ځای، په هر بستر کې دوه یا درې ناروغان دي.»
بي بي کوه هم دوه ماشومان لري او د غور له شهرک ولسوالۍ دلته راغلې وه. هغې وویل چې لس ورځې کېږي ماشومان یې د درملنې لپاره د غور ولایتي روغتون ته راوستلي دي.
بي بي کوه هم شکایت وکړ: “ډاکتران سمه رسېدنه نه کوي؛ خو موږ درمل خپله اخلو؛ ځکه درمل نه شته، ځای هم نه شته، په هر چپرکټ دوه یا درې ناروغان پراته دي.»
دواړو سرچینو له چارواکو وغوښتل چې د دغه ولایت په دولتي روغتیایي مرکزونو کې د درملو او ځای کمښت د ستونزې هواري لپاره اقدام وکړي.
د غور د عامې روغتیا رییس وویل، یادې ستونزې یې له عامې روغتیا وزارت سره شریکې کړې، چې د حل لپاره یې اقدام وکړي.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن