په کندهار ښار کې یو قاضي ووژل شو

کندهار (پژواک، ۱۷ غبرګولی ‍۱۴۰۰): وسله والو په کندهار ښار کې د استیناف محکمې پر یوه قاضي ډزې کړي او هغه یې وژلی دی.

پېښه يرون ماخستن شاوخوا ۱۰ بجې د کندهار ښار د ۲مې امنیتي حوزې اړوند په کارېز بازار سیمه کې شوې ده.

یوې امنیتي سرچینې پژواک اژانس ته وویل، د فیاض په نوم د کندهار د استیناف محکمې دغه قاضي نن ماخستن خپل کور ته پر لاره وو چې وسله والو ورباندې ډزې کړي او هغه یې وژلی.

بریدګر تښتېدلي دي.

تر اوسه د دې پېښې مسوولیت چا نه دی اخیستی.

په کندهار له ډېرو کلونو راهیسې هدفې وژنې روانې دی چې تر دې مهاله سلګونو نظامي او ملکي چارواکو، دیني عالمانو، مخورو، مېرمنو او ځوانانو په دغو پېښو کې خپل ژوند له لاسه ورکړی دی.

Views: 158