پارون (پژواک، ٧ زمرى ١٤٠٠): د نورستان چارواکي وايي چې په ګامدېش ولسوالۍ کې د سيلابونو له امله لسګونو کسانو ته مرګ ژوبله اوښتې او ګڼ شمېر کورونه نړېدلي دي.
د نورستان والي حافظ عبدالقيوم د زمري په اوومه پژواک خبري اژانس ته وويل چې تېره شپه د ګامدېش ولسوالۍ په ميرديش کلي کې سيلابونه راغلي دي.
هغه وايي چې د همدې سيلابونو له امله ٩٠ سلنه کلى ويجاړ شوی او لسګونو کسانو ته مرګ ژوبله اوښتې ده.
ده زياته کړه: ((دغه سيمه د طالبانو په کنټرول کې ده، زموږ ټيمونه اماده دي چې له سيلاب ځپلو سره مرسته وکړي خو که طالبان اجازه ورکړي.))
دغه راز د نورستان د والي وياند سعيد مومند پژواک ته وويل چې د ياد سيلاب له امله لسګونه کورونه نړېدلي او ٩٠ کسانو ته مرګ ژوبله اوښتې ده.
دغه راز يو بلې سرچينې پژواک ته وويل چې د ياد سيلاب له امله د ٤٠ مړه شوو کسانو جسدونه تر اوسه موندل شوي دي.
په دې اړه به نور جزئيات وروسته خپاره شي.
Views: 104
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن